A Subida Cidade de Pontevedra afronta a súa maioría de idade con lixeiros cambios no percorrido
Por Diego Espiño
Cun novo cambio de data, pasa a celebrarse os días 4 e 5 de xullo, pero coas ganas de sempre. Así afrontan na Escudería Ciudad de Pontevedra unha nova Subida Cidade de Pontevedra, que cumpre a súa maioría de idade ao alcanzar a súa XVIII edición.
Coincidindo co sinalado da data, a organización decidiu introducir varias novidades, como o cambio no inicio e final do percorrido buscando "un pouco máis de espectáculo", recoñeceu na presentación Florentino Leiro, presidente da escudería pontevedresa.
Desta forma recortaranse case 400 metros de percorrido na saída que se engadirán en meta chegando ata o polígono da Reigosa.
A suba celebrarase un ano máis na estrada que une Pintos (Marcón) co polígono do Campiño-Reigosa, sendo os primeiros adestramentos e mangas de competición a partir das 16:30 horas do sábado e os segundos adestramentos xunto á terceira e cuarta manga o domingo dende as 9:30 horas.
O parque pechado volverá instalarse na céntrica Praza de España achegando a competición á cidade, coas verificacións no peirao das Corbaceiras.
Incluída de novo no Campionato Galego de Montaña, a proba automobilística conta ademais co aliciente do posible debut do Audi TT DTM do pontevedrés Santi Abad, unha estrea esperada con impaciencia polos afeccionados ao motor.
PONTE CALDELAS APOSTA POR UNHA SUBIDA PROPIA
Por primeira vez a Subida Cidade de Pontevedra concluirá na Reigosa, dentro do Concello de Ponte Caldelas, encontrando a organización unha colaboración plena dende o novo goberno local comandado por Andrés Díaz.
O alcalde mostrouse encantado coa posibilidade de axudar nesta proba pero desvelou que "estamos en conversas para que o ano que vén teñamos subida propia", unha cita que tamén estaría incluída no calendario do Campionato Galego de Montaña.