O Leis cumpre ante o Xove e xogarase o campionato na última xornada
Por Redacción
A goleada do Leis Pontevedra na casa ante o Xove (6-1) permitirá chegar ao conxunto lerezano coas súas opcións intactas á última xornada da Terceira División de Fútbol Sala, na que pelexará por lograr o campionato e o conseguinte ascenso de categoría.
Os de Manu Cossío, tras o tropezo do Pazos de Borbén en Santiago, son colíderes xunto a Burela B e A Estrada a falta dun partido para o final da liga.
Na xornada definitiva o Leis deberá gañar a domicilio ao 5 Coruña FS e esperar un tropezo da Estrada na difícil cancha do Carballiño.
En canto ao partido contra o Xove os pontevedreses impuxéronse con máis facilidade da esperada. Tardaron nove minutos en inaugurar o marcador e a partir de aí aumentaron a súa renda sen pasar demasiados apuros.
Antes dos encontros do equipo masculino e feminino o club presentou a todos os seus equipos de base, que xunto aos sénior protagonizaron a tradicional foto de familia.