Quirónsalud Miguel Domínguez combina Pediatría e Diverhospital
O Hospital Quirónsalud Miguel Domínguez puxo en marcha recentemente o seu novo Servizo de Pediatría con incorporacións, tanto de profesionais como de equipamentos, e unha curiosa iniciativa: o Diverhospital. Trátase de facer a contorna hospitalaria máis amable, especialmente para os nenos.
Aproveitamos a visita ao Servizo de Pediatría para trasladar á doutora Mónica Camaño algunhas cuestións que interesan ás familias no coidado da saúde dos máis pequenos.
Doutora Camaño, en poucos días pasamos dunhas temperaturas estivais a un tempo máis próximo ao inverno. Quería preguntarlle por aquelas enfermidades que máis incidencia están a ter nestes días de "tempo tolo" entre os máis pequenos.
- Os contrastes de temperatura producen patoloxías sobre todo na poboación infantil, que é máis susceptible. E as enfermidades que máis nos atopamos son as afeccións respiratorias, como farinxite ou pneumonía. Tamén hai máis frecuencia de enfermidades gastrointestinais. No caso dos nenos con dermatite atópica, a súa pel padece moito estes cambios de tempo.
Podemos dar algún consello aos pais para que poidan protexer aos seus fillos?
- Hai un 15% de nenos con dermatite atópica e por iso deben hidratarlles moito a pel. Para todos, aconséllase abrigar aos nenos pola mañá e alixeirar a roupa ao mediodía, así como poñer protección solar. Tamén debemos lavarnos a miúdo as mans con auga e xabón para evitar o contaxio das enfermidades respiratorias e gastrointestinais, ademais de non compartir utensilios nas comidas.
Hai algunha doenza de base en nenos onde os pais teñan que estar máis pendentes?
- Sobre todo en nenos con dermatite atópica, alerxias ou que teñan patoloxías respiratorias crónicas.
E se falamos de prevención, non podemos esquecernos das vacinas. Resulta sorprendente que ata hai pouco tempo en cada Comunidade Autónoma houbese un calendario diferente.
- Ata xaneiro de 2017 había 17 calendarios vacinais en España porque desde 1981 cada Comunidade Autónoma tiña o seu propio calendario. E por fin en xaneiro de 2017, o Sistema Nacional de Saúde unifica o calendario, o que é moito máis fácil para as persoas que teñan que viaxar por traballo e desprazarse cos seus fillos a outra Comunidade Autónoma.
E que ocorre cos nenos que xa empezaron co calendario anterior a 2017?
- Sobre todo o máis complicado está en unificar o anterior calendario con este. Aos nenos nados a partir do 1 de xullo de 2016 estáselles poñendo xa a vacinación actual. Pero cos anteriores, hai que rexerse polo calendario anterior para poñelos ao día e continuar posteriormente coa "nova" vacinación. Tamén incluíron, cousa importante, a vacina da varicela neste novo calendario, que ten a súa importancia dado que é unha patoloxía vírica, inicialmente benigna, pero que pode ter as súas complicacións que podemos evitar.
Tamén se falou nos últimos tempos de problemas de abastecemento da vacina da meninxite, como está a situación nestes momentos?
- A meninxite, sobre todo a producida polo meningococo B, porque hai varios tipos de meninxite e algúns deles xa están incluídos no calendario vacinal. En España introduciuse desde 2013 e a súa alarma social fixo que moita xente queira vacinar aos seus fillos e a empresa farmacéutica non deu abasto con todos os lotes de vacinación necesarios. Realmente é unha enfermidade moi pouco frecuente, a súa incidencia é moi baixa, pero si moi grave. Entón os pediatras situámonos en que se temos que recomendar unha vacina que demostrou o seu risco-beneficio, si que a recomendamos, porque moralmente como pai o risco de padecer unha enfermidade así podendo evitala coa vacinación é importante. Aínda así, a vacinación só protexe contra un 80% das cepas, pero todo o que poidamos protexer é importante. O problema é o custo que leva e que de momento non entra dentro do calendario vacinal.
Desde o Servizo de Pediatría, vostedes ofrecen tamén asesoramento aos pais sobre hábitos de vida saudables. Supoño que os que máis demandan estes consellos son os pais primeirizos.
- En xeral, os primeirizos, como adoitamos dicir, están nun ámbito moi descoñecido e con moitas dúbidas que demandan resolver. Pero a recomendación é para todos os pais, xa que é importante inculcar hábitos saudables desde o primeiro momento de vida, incidindo nunha hixiene adecuada, nunha alimentación e en realizar deporte. Porque todo o que inculquemos de pequenos vai quedar para toda a nosa vida.
A pesar da prevención, os máis pequenos tristemente tamén enferman. Que especialidades ofrece o Servizo de Pediatría do Hospital Quirónsalud Miguel Domínguez?
"O importante é que aquí poden dar a luz as mamás e o bebé xa é atendido polo pediatra, o mesmo que logo lle atenderá para descartar e ver as súas patoloxías no seguimento"
- O importante é que aquí poden dar a luz as mamás e o bebé xa é atendido polo pediatra, o mesmo que logo lle atenderá para descartar e ver as súas patoloxías no seguimento. Á súa vez, tamén estará aí para realizar os controis de saúde e a vacinación, sempre o mesmo pediatra. Incluso atendendo urxencias nos momentos necesarios e, se necesitan hospitalización, tamén será realizada aquí.
Aos pais sempre lles asusta a visita dos seus fillos ao hospital. Como se pode tranquilizar ás familias sobre as vantaxes da contorna hospitalaria?
- O bo de estar nunha contorna hospitalaria é que temos a tecnoloxía necesaria para levar a cabo un diagnóstico rápido e eficaz con todas as probas que lle poidamos realizar en caso de que sexa necesario: radiolóxico, analítica, monitoraxe e tamén coller unha vía no seu momento, poñer osíxeno ou unha nebulización, que ás veces se nos dá o caso. E ter ao neno observado e monitorado en momentos nos que non precisa ingreso, pero que si necesita unha supervisión dunhas horas. Todo isto permítenos que logo se poida ir á súa casa nas mellores condicións.
E por último, quería preguntarlle por un programa innovador que se está implantando en todos os Hospitais do Grupo Quirónsalud: o Diverhospital, en que consiste?
- Chamámolo Diverhospital porque queremos que o hospital, na medida do posible, sexa unha contorna lúdica e interactiva onde os nenos perciban que son lugares amables e interesantes para eles, que non vexan ao pediatra como un inimigo, senón como un aliado. Un sitio onde teñen os seus xoguetes, que forman parte da súa vida, que isto lles tranquilice e que vexan que é unha zona familiar para eles.
* A Doutora Mónica Camaño forma parte do novo Servizo de Pediatría que puxo en marcha o Hospital Quirónsalud Miguel Domínguez, coordinado polo pediatra Ramiro Blanco, e onde se dá unha atención integral ao coidado da saúde dos nenos de 0 a 14 anos.
Relacionadas:
-
Lecturas de verán para estimular a linguaxe na poboación infantil
Por Noticia patrocinada |
-
Guía de consellos para coidar a saúde dos nenos no verán
Por Redacción |
-
Escolares de Marcón, así traballa un pediatra
Por Redacción |
-
Novo servizo de Pediatría no Quirónsalud Miguel Domínguez cos doutores Ramiro Blanco e Mónica Camaño
Por Redacción |
-
Os centros sanitarios de Quirónsalud Pontevedra implantan a súa nova imaxe corporativa
Por Redacción |