O ano 2018 ten un protagonista indiscutible no deporte pontevedrés, Pablo Dapena, tras completar unha espectacular tempada que lle permitiu entrar por dereito propio na elite internacional do tríatlon de longa distancia.
O ano empezou cun segundo posto no Challenge de Roma, e pouco despois chegaría o primeiro aviso de que Dapena ía máis en serio que nunca ao impoñerse en Gran Canaria por diante de todo un campión do mundo Ironman como o alemán Patrick Lange.
Era só o principio dun curso que tivo o seu momento álxido no Campionato do Mundo de Longa Distanciacelebrado en Odense, Dinamarca, dentro do ITU Mulstisport Festival e ante unha nutrida representación pontevedresa pendente de recoller a testemuña da competición que organizará a Boa Vila en 2019 e que celebrou ao grande a súa medalla de ouro.
Tan ben lle ía a tempada que se colocou á fronte do ranking mundial da franquía Challenge aspirando a un bonus de 30.000 dólares que finalmente compartiu con Sebastian Kienle. Ese obxectivo fíxolle renunciar a competir en Pontevedra no Campionato de España da especialidade, unha cita que servía para poñer a proba o circuíto do mundial e no que a protagonista local foi Saleta Castro, subcampioa nacional ante os seus no seu mellor resultado dun curso complicado.
Renunciou para preparar a súa participación no Campionato de Europa de Longa Distancia que se celebraba en Madrid, onde deu o salto por primeira vez á distancia Ironman pensando nun dobrete histórico e conseguindo finalmente a medalla de prata tras un esforzo sobrehumano.
Resultados excepcionais que supuxeron na parte final de ano un salto cualitativo no seu status, permitíndolle fichar polo equipo profesional BMC Vifit Sport de tríatlon e augurando un futuro de grandes retos deportivos. Pablo Dapena foi un dos protagonistas do ano ademais na Playlist de PontevedraViva Radio, programa no que deixou ver o seu lado máis persoal.
GÓMEZ NOYA, ASALTO SEN ÉXITO AO IRONMAN DE HAWAII
A tempada para o tríatlon pontevedrés tivo outro foco informativo no intento de Javi Gómez Noya de converterse no primeiro debutante en gañar o Campionato do Mundo Ironman en Hawaii.
Todo o ano do galego enfocouse cara a ese obxectivo, na súa primeira aproximación á longa distancia. Preparouse a conciencia, debutando en xuño en Cairns, Australia, cun prometedor segundo posto. Con todo, a pesar das grandes expectativas e a estar situado por todos entre os favoritos ao triunfo, ao chegar a hora da verdade Gómez Noya non tivo o seu mellor día e afectado pola calor e a humidade de Hawaii terminou a prestixiosa proba na undécima posición.