O Club Baloncesto Arxil xa traballa na planificación da próxima tempada, na que repetirá presenza na Liga Feminina 2 coa mira posta en pelexar polo play-off de ascenso.
O salto de categoría escapouse por detalles a campaña recentemente finalizada, por iso a principal prioridade da comisión deportiva arxilista encabezada pola adestradora Mayte Méndez é lograr a continuidade do seu núcleo duro.
Nesa terna atópanse a serbia Dunja Buzadzin, a norteamericana Heather Forster, a bahameña Ruth Adams ou Nerea Liste, xunto ás xogadoras de casa e asentadas no club desde hai anos.
Ademais prevese realizar unha incorporación no posto de escolta para cubrir a longa convalecencia á que enfronta María Lago,lesionada de gravidade na fase de ascenso de Melilla e que estará aínda moitos meses afastada das canchas de xogo.
Só no caso de que se produzan saídas o Arxil valorará realizar máis fichaxes para o seu primeiro equipo, tentando apoiarse ao máximo no seu filial mantendo a súa filosofía de traballo.