Alén da Noite provocará sensacións na escuridade este Samaín en Soutomaior
Por Anxo Lourido
O martes 31 de outubro, Soutomaior acollerá unha proposta terrorífica especial para adolescentes con idades comprendidas entre 14 e 17 anos.
Baixo o título Alén da Noite, a actividade consistirá nun circuíto que deberá percorrerse por unha contorna aberta sen que haxa sinais indicativas. A iniciativa estará organizada por grupos e ambientada na celebración do Samaín.
As persoas participantes deberán seguir indicacións para avanzar polo espazo escuro en busca de diferentes obxectivos e superando os retos que se presenten.
Ao longo do traxecto sumaranse as sensacións que provoque o ambiente tenebroso e a organización avanza que haberá sorpresas.
Desde o Concello de Soutomaior recomendan calzado de cordóns, roupa cómoda, unha lanterna e auga. A actividade comezará ás 20.00 horas na Alameda de Talo Río.
A inscrición para participar nesta actividade permanecerá aberta ata o 27 de outubro no pavillón da Montesiña, en horario de 16.30 a 21.30 horas.