Caldas retira as plantas exóticas invasoras na contorna do Umia
Por Redacción
Este martes remataban os traballos para eliminar as plantas exóticas e invasoras nas marxes do tramo urbano do río Umia, ao seu paso por Caldas de Reis, na ponte da Ferrería da N-550, na Casa do Concello e na marxe dereita do río entre o Muíño e o Xardín Botánico.
A presenza de especies invasoras fora colonizando as marxes e impedía o normal desenvolvemento de especies herbáceas, arbóreas e arbustivas autóctonas, provocando un desequilibrio no ecosistema fluvial.
O Concello de Caldas de Reis informa que as actuacións de mellora ambiental consistiron na limpeza e eliminación de especies invasoras, a roza selectiva de vexetación arbustiva con medios manuais, así como as podas necesarias e retirada de restos de ramaxe ou árbores mortas.
Algunhas das especies eliminadas están incluídas no 'Catálogo español de especies exóticas invasoras', como o caso da Acacia melanoxylum, a Tradescantia fluminensis ou a Ipomea indica. Outras son especies alleas ao ecosistema fluvial do Umia e poden competir coas propias do mesmo, polo que se considerou conveniente a súa eliminación. Trátase de exemplares de Bidens sp, Delairea odorata, Crocosmia x crocosmiflora, Erigeron karvinskianus, Persicaria capitata, Phytolacca americana e Delairea odorata.
O Concello de Caldas investiu nesta actuación preto de seis mil euros do seu orzamento, á espera da resposta á solicitude dunha subvención do Fondo de Compensación Ambiental da Xunta de Galicia dedicado á conservación, reposición e restauración do ambiente. Os traballos foron realizados pola empresa Copasa a partir do proxecto redactado polo enxeñeiro agrícola José Recamán, quen tamén dirixiu a súa execución.
O concelleiro de Medio Ambiente e Obras, Manuel González, destaca que "con esta actuación ordenada e planificada tecnicamente melloramos o ecosistema fluvial do Umia no seu tramo urbano, eliminamos as especies exóticas e invasoras e potenciamos o desenvolvemento das especies autóctonas. Ao mesmo tempo poñemos en valor a ponte da Ferrería e o edificio do Concello, que será obxecto dun proxecto de restauración das súas fachadas para evitar o crecemento de vexetación nos propios paramentos".
Pola súa banda, o alcalde Juan Manuel Rey destacou o compromiso do Concello coa protección da biodiversidade e a conservación dos ecosistemas fluviais, sinalando que "esta actuación forma parte do recoñecemento de Caldas no certame de Vilas en Flor que ten unha compoñente importante na posta en valor e a integración da vexetación na paisaxe urbana e fluvial".
Relacionadas:
-
Tres espazos naturais de Caldas, certificados como destino de turismo científico botánico
Por Redacción |
-
Caldas quere incluír o "pino manso" de Reirís no catálogo de árbores senlleiras
Por Redacción |
-
Caldas prepara andainas guiadas para dar a coñecer a biodiversidade do Umia e a súa contorna durante o verán
Por Redacción |
-
Caldas ten as súas augas de abastecemento libres de cianobacterias
Por Redacción |
-
Traballos de conservación e mantemento no leito do río Bermaña, en Caldas de Reis
Por Redacción |
-
Caldas arromba as súas zonas verdes ante a autorización de posibles saídas
Por Redacción |
-
Rozan e limpan de maleza o perímetro do encoro da Baxe
Por Redacción |