A quen non lle chegou o meme que di iso de: este ano que todos queremos saúde, verás como vai e tócanos a Lotería de Nadal. Se é cuestión de probabilidades por número de décimos na carteira, neste Sorteo Extraordinario de Nadal, en xeral, as posibilidades son menores xa que nos portelos resenten un descenso como explica Mari Carmen García Cabezudo, propietaria da Administración de Loterías número 9 de Pontevedra, situada na rúa Peregrina.
No ámbito da sorte, as supersticiones, pálpitos, soños ou crenzas teñen prioridade; así que a teor do conta Mari Carmen en PontevedraViva Radio, os pontevedreses están a buscala en billetes terminados en 19 e en 20, "o 19 pola covid e o 20 por este ano". Incluso un número, dos chamados baixiños pero redondo e co nome deste nefasto ano: o 2020, é un dos máis solicitados. De forma reiterada preguntáronlle por el, pero non o tiña. Estaba a venderse integramente en administracións de Madrid, Valladolid e Valencia.
Tradicional é este Sorteo Extraordinario e tradicional é acordarse dos familiares e achegados para regalar ou compartir uns décimos; intencións que solicitan nesta Administración máis se cabe este ano, no que iso de comprar lotería alí onde pasaches uns días de vacacións non foi tan frencuente pola pandemia.
Outra estampa que tocará o vindeiro martes 22 é a que corresponda ás celebracións entre os agraciados. Terán que ser máis sobrias e desde logo non deben nin poden ser as que comparte a memoria común. Iso si, a invitada deste Cara a cara, arranxarase debidamente para a ocasión "polo si ou polo non" e meterá a botella de cava a arrefriar por se toca abrila.