Coñece os aspectos máis destacados do novo decreto de estado de alarma
Por Redacción
O Boletín Oficial do Estado (BOE) publicou este domingo o decreto co que o Goberno declara un novo estado de alarma con vixencia en todo o territorio nacional fóra das Illas Canarias.
"Na actualidade, a ocupación media en España de camas de hospitalización por COVID-19 supera xa o 12 %, con máximos por encima do 20 % nalgunhas comunidades autónomas. A ocupación media de camas de Unidades de Coidados Intensivos é do 22,48 %, superando nalgún caso o 60 %. Esta situación volve a tensionar o noso sistema sanitario, requirindo a adopción urxente de medidas de control que eviten calquera impacto negativo desta situación sobre a atención sanitaria a outras patoloxías diferentes a COVID-19, previndo desde un primeiro momento calquera risco de potencial colapso do sistema asistencial", xustifica nos seus parágrafos iniciais o texto.
En relación ás medidas aprobadas, que poden ser ampliadas por cada goberno autonómico como autoridade competente delegada, establécense varios aspectos destacados.
TOQUE DE QUEDA
Durante o período comprendido entre as 23:00 e as 6:00 horas, as persoas unicamente poderán circular polas vías ou espazos de uso público para a realización de actividades como a adquisición de medicamentos ou bens de primeira necesidade, asistencia a centros sanitarios ou de atención veterinaria con motivo de urxencia, cumprimento de obrigacións laborais, retorno ao lugar de residencia tras realizar algunha destas actividades, asistencia e coidado de maiores, menores ou dependentes ou por causas de forza maior.
A autoridade competente delegada correspondente poderá determinar, no seu ámbito territorial, que a hora de comezo da limitación prevista neste artigo sexa entre as 22:00 e as 00:00 horas e a hora de finalización da devandita limitación sexa entre as 5:00 e as 7:00 horas.
MOBILIDADE
Restrínxese a entrada e saída de persoas do territorio de cada comunidade autónoma salvo para aqueles desprazamentos, adecuadamente xustificados, tales como asistencia a centros sanitarios, cumprimento de obrigacións laborais, asistencia a centros universitarios ou retorno ao lugar de residencia habitual ou familiar.
REUNIÓN DE PERSOAS
A permanencia de grupos de persoas en espazos de uso público, tanto pechados como ao aire libre, quedará condicionada a que non se supere o número máximo de seis persoas, salvo que se trate de conviventes.
A autoridade competente delegada correspondente poderá determinar, no seu ámbito territorial, á vista da evolución dos indicadores sanitarios, epidemiolóxicos, sociais, económicos e de mobilidade, que o número máximo a que se refire o apartado anterior sexa inferior.
LUGARES DE CULTO
Limítase a permanencia de persoas en lugares de culto mediante a fixación, por parte da autoridade competente delegada correspondente, de aforos para as reunións, celebracións e encontros relixiosos, atendendo ao risco de transmisión que puidese resultar dos encontros colectivos. Dita limitación non poderá afectar en ningún caso ao exercicio privado e individual da liberdade relixiosa.
FLEXIBILIZACIÓN DAS MEDIDAS
A autoridade competente delegada en cada comunidade autónoma poderá, no seu ámbito territorial, á vista da evolución dos indicadores sanitarios, epidemiolóxicos, sociais, económicos e de mobilidade, flexibilizar e suspender a aplicación das medidas.
Relacionadas:
-
Galicia poderá suprimir ou ampliar o toque de queda a partir do 9 de novembro
Por Alejandro Espiño |
-
Reforzan a vixilancia policial sobre o cumprimento das restricións pola covid-19
Por Alejandro Espiño |
-
O Goberno decreta un novo estado de alarma, con toque de queda xeneralizado entre as 23.00 e as 6.00 horas
Por Diego Espiño |
-
Pedro Sánchez pide concienciación e disciplina cidadá: "Podemos y debemos detener al virus sin detener la vida"
Por Natalia Puga |