Así é o 'coliving' de Anceu, unha evolución dos tradicionais 'coworking'
Por Redacción
Os tradicionais 'coworking', espazo de traballo que comparten persoas de diferentes compañías para aforrar gastos ou colaborar en proxectos en común, parecen estar evolucionando. A España chegou unha nova fórmula que dá un paso máis nesta convivencia.
Son os coñecidos como 'coliving' dos que apenas existen unha decena en toda España. E un deles vén de implantarse en Anceu, un pequeno lugar de Ponte Caldelas. Nel, combínanse o traballo e o lecer nun espazo de intercambio de experiencias e vivencias de xeito cooperativo.
Agustín Jamardo, un mozo pontevedrés que leva anos percorrendo diferentes países por cuestións laborais, atopou na aldea de O Ramís o lugar axeitado para poñer en marcha esta iniciativa de futuro, que visitou este martes o alcalde, Andrés Díaz.
Programador dunha empresa con sede en Singapur, Jamardo destaca que o lugar elixido é un entorno rural e rodeado de natureza, algo que combina coa opción para conectarse a internet a unha máxima velocidade de ata 600 megas reais de subida e baixada para traballar.
Estes días están a convivir na súa casa de Anceu 25 profesionais de diferentes ámbitos con nacionalidades moi variadas, entre elas EE UU, Canadá, Singapur, Polonia ou Indonesia, xa establecidos en diferentes provincias españolas e que pasan unha tempada en Ponte Caldelas.
Todos teñen postos que lle permiten traballar á distancia e dispoñen dun nivel adquisitivo alto que repercutirá positivamente no comercio e na hostalería de Ponte Caldelas.
O seu responsable explica que as sinerxías que xorden destas experiencias ofrecen moi bos froitos a nivel persoal e laboral, pois o espazo de convivencia e traballo forman un 'brainstorming' continuo no que todas as persoas que conviven saen beneficiadas.