Reapertura da oficina de Turismo Rías Baixas no Palacete das Mendoza
Por Redacción
Este martes 9 de xuño, a Deputación de Pontevedra reabrirá ao público a Oficina de Turismo Rías Baixas situada no Palacete das Mendoza, na Praza de Santa María en Pontevedra, despois do parón provocado pola crise sanitaria da Covid-19.
Con todas as medidas de seguridade e cun Plan de Continxencia específico, a oficina abrirá as súas portas nos horarios habituais e a atención aos visitantes farase cun 50% de aforo e coas medidas de protección xa establecidas no resto das dependencias provinciais.
As medidas de seguridade contemplan que os visitantes accedan ao recinto tras pasar por alfombras de desinfección do calzado, control de medición de temperatura e uso de hidroxel alcólico, ademais da obrigatoria utilización de máscaras protectoras en todo o Palacete. Así mesmo, fomentarase o acceso á información turística ao través de códigos QR para evitar o uso de papel.
En canto ás outras dúas oficinas turísticas da Deputación, o punto de información do Aeroporto de Peinador ten previsto a súa reapertura o próximo 1 de xullo, mentres que o do Mosteiro da Armenteira o fará ao longo da primeira semana de xullo, xa que atende fundamentalmente a grupos.
Respecto ás oficinas dos concellos da provincia, adheridas á Rede Info Rías Baixas, a previsión é que todas estean en funcionamento entre a última semana de xuño e a segunda de xullo. Precisamente, fóronse mantendo reunións con todos os concellos para constituír os Comités de Xestión do Risco e poñer en marcha os protocolos hixiénico-sanitarios, así como os medios de atención ao público, subministrados pola Deputación, e que xa están activados.
Todos os concellos da Rede estableceron os procedementos para a contratación do persoal informador turístico ante a proximidade da reapertura das oficinas. Os municipios con oficinas turísticas adheridas á Rede Info Rías Baixas son: A Illa de Arousa, A Guarda, Baiona, Cambados, Cangas, Moaña, Cuntis, Nigrán, Ribadumia, A Estrada, Bueu, Marín, Meaño, Poio, Ponteareas, Caldas de Reis, Salvaterra do Miño, Oia, As Neves e Catoira.
Relacionadas:
-
Os soportes dixitais posiciónanse como os mellores aliados para a campaña turística 'Segue ou teu instinto' da Deputación
Por Redacción |
-
A Deputación lanza a campaña de promoción turística "Ven" poñendo o foco na seguridade
Por Oskar Viéitez & Mónica Patxot |
-
A Oficina de Turismo vai instalarse na antiga Casa do Concello
Por Redacción |
-
A Deputación repartirá entre a hostalería 250.000 salvamanteis con promoción turística
Por Redacción |
-
O turismo volverá en xullo pero as axencias de viaxe de Pontevedra seguen pechadas
Por Manu Otero |
-
"Garantía sanitaria, flexibilidade na oferta e confianza", factores crave para reactivar o turismo nas Rías Baixas
Por Oskar Viéitez |