Dúas queimas incontroladas requiren actuacións de emerxencia en Cuntis e Portas
Por Redacción
O Servizo Municipal de Emerxencias e Protección Civil de Cuntis tiveron que intervir durante a xornada deste luns no seu propio municipio e en Portas a raíz de dúas queimas domésticas descontroladas que acabaron provocando dous pequenos incendios.
Segundo a información facilitada desde o Concello de Cuntis, a primeira intervención rexistrouse sobre as 09.55 horas da mañá. O servizo recibiu un aviso por un posible incendio forestal nunha zona próxima á igrexa da parroquia de Arcos de Furcos, en Cuntis.
Unha vez no lugar, os membros de Protección Civil comprobaron que se trataba dunha queima doméstica realizada por un particular nos restos vexetais dunha leira da súa propiedade. O propietario prendeu lume directamente sobre o mato de vexetación, que non fora previamente cortada nin agrupada tal e como establece a normativa, de maneira que o risco de propagación era moi alto.
A persoa responsable impediu nun primeiro momento a actuación dos servizos de emerxencias e foi preciso solicitar a intervención do responsable do Distrito Forestal para que finalmente se puidese proceder á extinción.
Xa pola tarde, pasadas as 18.00 horas, o corpo de emerxencias desprazouse ao veciño concello de Portas para participar na extinción dun lume que se estaba propagando nunha propiedade privada a partir dunha queima de restos descontrolada.
Non houbo que lamentar danos a maiores en ningunha das dúas intervencións, pero desde Protección Civil aproveitan para lembrar que é obrigatorio solicitar permisos ante a Consellería de Medio Rural para a realización de calquera queima doméstica, así como cumprir as normas de seguridade e prevención necesarias.