Comeza "DegustaNaCasa", a campaña de apoio á hostalería local de Ponte Caldelas
Por Redacción
O alcalde de Ponte Caldelas, Andrés Díaz, repartiu este sábado as fiambreiras gratuitas entre os seis primeiros establecementos de hostalería que se adheriron á iniciativa "DegustaNaCasa", a campaña de apoio e promoción da hostelería de Ponte Caldelas a través da que veciños do municipio e da contorna poden seguir disfrutando das propostas culinarias dos hostaleiros de Ponte Caldelas na súa propia casa.
Bar Alameda, El Chavo Casa de Comidas, Churrasquería A Lareira, Tapería Klimbin, Tapería Victoria e Mesón Mexicano son os seis primeiros locais que se sumaron á campaña. Cada local ofrece cinco menús, dos cales un ten un prezo non superior aos 6 euros.
O Concello elaborou un folleto con todas as propostas culinarias e cos teléfonos de contacto para que os veciños interesados fagan os pedidos directamente ao establecemento. Todos os locais entregarán un folleto en cada reparto a domicilio e tamén se fará buzoneo para chegar ao maior número de clientes posible. Ademais, o Concello de Ponte Caldelas porá en marcha unha campaña publicitaria a través das redes sociais e dos medios de comunicación da provincia de Pontevedra.
"Nun momento no que a hostelería ten un futuro incerto, é importante que todos nos solidaricemos cos negocios locais, que os apoiemos nun momento difícil para que poidan seguir adiante. Esta proposta é unha boa alternativa para que todos sigamos comendo os pratos dos grandes cociñeiros que temos en Ponte Caldelas e, ao mesmo tempo, esteamos poñendo en práctica unha acción solidaria que garanta o mantemento dos negocios locais", indica Andrés Díaz.