A Xunta defende que se eliminen as franxas horarias e as limitacións ao municipio na práctica deportiva
Por Oskar Viéitez
A Xunta de Galicia defende que se eliminen as franxas horarias e a limitación de non poder saír do municipio na práctica deportiva. O Goberno galego entende que, xa na fase 1, deben levantarse estas limitacións que non están vixentes para outras actividades de tipo social, de restauración ou de turismo.
Así se abordou este sábado na novena reunión do Centro de Coordinación Operativa (Cecop), que acordou elevar ao Goberno central un consulta neste sentido para que faga "unha aclaración moi necesaria" neste asunto. A reunión estivo presidida polo vicepresidente da Xunta, Alfonso Rueda, e contou con representación da Delegación de Goberno e da Federación Galega de Municipios e Provincias (Fegamp).
Actualmente, existen distintas prácticas permitidas sen franxas horarias e que tampouco están restrinxidas aos límites do municipio, xa que se permite a mobilidade dentro da provincia. De aí que a Xunta entenda que debe haber un trato igual para a práctica deportiva tendo en conta, ademais, que os horarios restrinxen significativamente a algunhas modalidades deportivas -como o surf ou o ciclismo- e provocan, á súa vez, aglomeracións ás horas nas que si se poden practicar.
Segundo Rueda, "se a día de hoxe a vida social xa está máis ampliada, se se pode desprazar calquera persoa por toda a provincia e está permitido o desprazamento á segunda residencia, o que non ten sentido é que se siga obrigando aos milleiros de persoas que fan deporte todos os días a que o fagan nunhas horas concretas do día e que se teñan que circunscribir ao seu termo municipal".
En resumo, "estamos facendo sempre un chamamento á responsabilidade da cidadanía, a que cumpra as normas e a que observe as garantías sanitarias. O que temos que ser tamén é coherentes e ditar normas que estean en consonancia co aquelo que se está pedindo", explicou o vicepresidente.
APERTURA DE ESTABLECEMENTOS
O Cecop tamén abordou medidas no ámbito comercial. Tendo en conta a progresiva recuperación da actividade comercial que se prevé para as próximas semanas, tamén se acordou deixar sen efecto o punto cuarto do Acordo do 15 de marzo, que, co obxectivo de garantir o abastecemento da poboación, establecía a liberdade horaria para os establecementos de primeira necesidade.
Así, volven estar vixentes as limitacións establecidas na Lei 13/2006, de horarios comerciais de Galicia, que fixa que só teñen liberdade horaria os establecementos de ata 300 metros cadrados (excluídos os pertencentes a empresas ou grupos de distribución que non teñan a consideración de pequena e mediana empresa), entre outras excepcións.
Ademais, na reunión deste sábado tamén se acordou pedir ao Goberno central que clarifique se os establecementos que dispoñan dunha superficie maior a 400 metros cadrados poidan reiniciar a súa actividade na fase 1 reducindo temporalmente a súa superficie comercial ata dito límite, sempre que cumpran o resto de condicionantes establecidos. Esta demanda xa foi trasladada polo presidente da Xunta, Alberto Núñez Feijóo, na última reunión co presidente do Goberno, Pedro Sánchez, e outros presidentes autonómicos.
BIBLIOTECAS, MUSEOS E ARQUIVOS
No eido cultural, aprobouse o protocolo polo que se establece o reinicio da actividade presencial das bibliotecas, museos e arquivos xestionados pola Xunta de Galicia, un total de 23. Nos últimos días, cada centro directivo traballou nas actuacións necesarias para a reapertura seguindo as indicacións fixadas polo Ministerio de Sanidade. Tras esta fase preliminar de adecuación, inician progresivamente a atención presencial, que comezará o luns no caso das bibliotecas e un día despois, o martes, no dos museos.
Os primeiros servizos que se activarán nas bibliotecas serán o préstamo e devolución de materiais e a lectura en sala. Os fondos devoltos deberán pasar unha corentena de 14 días.
Pola súa banda, os museos abrirán cun terzo do seu aforo e sen visitas en grupos. Mentres, os arquivos manteñen inicialmente a atención telemática, reservando a atención presencial para casos imprescindibles e baixo cita previa. O protocolo, que busca garantir a seguridade sanitaria para traballadores e usuarios, foi xa abordado cos representantes sindicais e establece pautas e medidas de protección e hixiene.
CANON DA AUGA E TAXAS PORTUARIAS
Co obxectivo de dar facilidades ás empresas e contribuír a que teñan liquidez, o Cecop tamén acordou levar a cabo a exención do pagamento do canon da auga e do coeficiente de vertedura a aquelas empresas que se viron obrigadas a suspender a actividade polo Estado de Alarma e que tributan sobre unha estimación obxectiva do consumo, e non por consumo real, como os balnearios e outras empresas do sector servizos.
Relacionadas:
-
A Delegación de Goberno pedirá ás autoridades que facilite a práctica de deportes no mar
Por Manu Otero |
-
Os surfeiros federados xa poden moverse con liberdade por todas as praias da provincia
Por Manu Otero |
-
A Federación Galega de Ciclismo pide modificar os horarios para ciclistas evitando a saída e a posta do sol
Por Redacción |
-
Aquí non hai horarios para pasear ou facer deporte
Por Oskar Viéitez |