40 quilos de solidariedade directa dos froiteiros da Parda a RedeAxuda
Por Natalia Puga
As obras de humanización das rúas Juan Carlos I e Carrasqueira, no barrio da Parda, incluiron a plantación de árbores froiteiras ao longo da berarrúa. A estética é aplaudida polos veciños do entorno, que os "achega un pouco máis ao campo", pero agora que as plantas xa medraron empezaron a xurdir os inconvintes. As froitas maduras caen ao chan, xerando suciedade e risco para os viandantes. Para poñer freo a esta situación, este venres levouse a cabo unha iniciativa que combina convivencia veciñal e solidariedade: as ameixas que penduraban das ramas foron recollidas e entregadas con fins sociais a RedeAxuda.
O concelleiro delegado do barrio da Parda, Luís Bará, participou na recollida de ameixas das árbores froiteiras xunto a voluntarios da asociación de veciños Manuel Quiroga, dos comerciantes de Loureiro Crespo e adxacentes, residentes no lugar, integrantes da asociación Rexurdir e empregados de Cespa.
Durante a mañá xerouse un ambiente de convivencia nas rúas nas que se baleiraron unhas 25 árbores e a alegría chegou ao final, cando unha iniciativa que xurdiu dunha queixa inicial dos veciños da zona polo estropicio que causaban as froitas ao madurar se converteu nunha tarea altruista. Recolleron entre 40 e 50 quilos de froita, dos que algunhas pezas foron para os que participaron na actividade e a maior parte a entidades asociadas a RedeAxuda.
Luís Bará recoñeceu que este tipo de árbores non son as máis indicadas para os espazos urbanos por cuestións evidentes. Ante esta situación, a Concellaría xunto aos veciños organizaron esta recollida, unha actividade de carácter lúdico e social cun obxectivo a maiores, sensibilizar aos residentes de tal xeito que co tempo a iniciativa parta directamente dos veciños para que recollan eles, de motu propio, as ameixas.