Sanxenxo compra unha parcela para ampliar os accesos á praia da Panadeira
Por Redacción
Algo máis de 100.000 euros investirá o Concello de Sanxenxo nunha operación que permitirá ampliar os actuais accesos á praia de Panadeira. Será grazas á compra dunha parcela de 166 metros cadrados situada nas inmediacións do parque.
A operación, que foi asinada polo alcalde nunha notaría de Sanxenxo, valora a parcela en 86.403 euros. A ese diñeiro sumaranse 16.472 euros para demoler o muro que ten e construír un novo, segundo explica o goberno municipal.
Esta actuación iniciouse o pasado 11 de abril cunha resolución da Alcaldía coa que se abría o expediente para a compra destes terreos, cualificados como zona verde.
Ao non superar a compra o 10% dos recursos ordinarios do orzamento esta adquisición non debe pasar por pleno e corresponde ao alcalde a potestade de adquirila a través dun convenio cos propietarios.
O Concello explica que hai outras parcelas en distintos puntos do municipio que foron cualificadas como zona verde no PXOM de 2003, pero que son de titularidade privada.
O goberno municipal ten a intención de xestionar operacións similares a esta, que permitan incorporar ao patrimonio público espazos que contribúan a mellorar a accesibilidade e o lecer dos veciños.
Relacionadas:
-
Unha festa infantil inaugurará oficialmente o parque da Panadeira
Por Redacción |
-
Dez praias de Sanxenxo decláranse 'libres de fume' e do tabaco
Por Alejandro Espiño |
-
Sanxenxo mellora o acceso ao parque da Panadeira e ao colexio Abrente
Por Redacción |
-
A reforma do parque da Panadeira avanza mentres aumenta a oposición veciñal
Por Redacción |