A estrada provincial entre a N-550 e a igrexa de Perdecanai xa é vía 30
Por Redacción
A estrada provincial entre a N-550 e a igrexa de Perdecanai no Concello de Barro é xa oficialmente unha "vía 30". As obras realizadas polo departamento de Mobilidade da Deputación coa instalación de medidas de calmado de tráfico e nova sinalización horizontal e vertical obrigarán a reducir a velocidade dos coches a un máximo de 30 quilómetros por hora.
O deputado de Mobilidade Uxío Benítez supervisou este venres o final do proxecto, que supuxo a mellora global da estrada despois de 13 anos de remendos e obras parciais por parte dos anteriores gobernos provinciais.
Agora a veciñanza ten un itinerario peonil amplo polo que pode camiñar, con separadores do tránsito rodado que está máis acoutado, e hai redutores físicos de velocidade que impiden aos coches ir rápido. "Todo iso fai que a estrada sexa moito máis segura", apuntou Benítez.
A actuación na EP-0505 supón a reforma integral de 1.200 metros lonxitudinais de vía nos que se renovou a capa de rodaxe, se creou un espazo de tránsito peonil cun ancho accesible, se instalou novo saneamento, e tamén dispositivos de calmado de tráfico. Unha vez iniciada a obra, a maiores, detectáronse outras necesidades que foron incluídas como complemento, tales como a instalación dunha varanda de madeira nas inmediacións do regato que vai en paralelo á estrada, ou a terminación das cunetas en cemento nalgúns treitos da traza que carecían deste elemento ou onde estaba en mal estado.
Finalmente o investimento na obra foi de 327.565 euros, que serán financiados grazas ao convenio entre a Deputación e o Concello, que se repartirán o gasto ao 70%-30%.
Unha vez as obras sexan recepcionadas de maneira oficial iniciarase o proceso de cambio de titularidade para que o Concello sexa o propietario da vía e se encargue do seu mantemento.
Pola súa banda, o alcalde Xosé Manuel Abraldes sinalou que "pode haber moi pequenos axustes, pero esta é xa unha mellora completa e global que beneficiará á veciñanza por moitos anos e que deixa á estrada xa preparada para a conexión do saneamento", defendeu.