Expertas en urbanismo reclaman deseñar as cidades desde unha perspectiva feminista
Por Alejandro Espiño
As mulleres queren estar e utilizar as rúas e a noite "como parte de nuestra vida". É a reflexión que fixo este xoves en Pontevedra a arquitecta Marta Fonseca, membro do colectivo Punt 6, unha cooperativa de arquitectas, sociólogas e urbanistas que reclaman que as cidades se deseñen desde unha perspectiva feminista.
Ese é o eixo da nova xornada do ciclo Ubrtopías, que xunto con Fonseca reúne este xoves no Sexto Edificio do Museo á socióloga urbana Blanca Valdivia, a arquitecta Oihane Ruiz e a tenente de alcalde de Pontevedra, Carme da Silva. Será na mesa redonda "Transformacións urbanas con perspectiva de xénero", que moderará a xornalista Susana Pedreira.
Antes desta cita, Blanca Valdivia y Marta Fonseca e foron recibidas no Concello polo alcalde de Pontevedra, Miguel Anxo Fernández Lores, a quen felicitaron por impulsar na Boa Vila un modelo que pretende crear unha cidade máis amable e segura para as mulleres, recuperando o espazo público de xeito accesible, igualitario e inclusivo.
Ata agora, segundo a primeira destas dúas expertas, o deseño das cidades estivo enfocado en "priorizar" o seu modelo produtivo e a súa actividade económica, "deixando de lado" as actividades persoais dos seus cidadáns.
Así, explicou que actuacións como a colocación de varandas nas costas, de bancos creando zonas de estancias ou intervencións para garantir a accesibilidade son importantes para mellorar o "día a día" das mulleres ou os colectivos máis vulnerables.
A iso súmase, segundo Valdivia, que unha muller "cando pensa nos seus percorridos habituais" pensa non no itinerario máis rápido "senón no que percibe como máis seguro", polo que este tipo de percepcións deben ter o seu reflexo á hora de planificar as cidades.
De aí, que esta experta pedise "repensar" as cidades, algo para o que "non fai falta facer tabula rasa", senón ir adoptando medidas para que as áreas urbanas sexan "igualitarias".
Nesta liña, ven a experiencia de Pontevedra como un "modelo para seguir", ao apostar pola accesibilidade, a recuperación do espazo público como punto de encontro ou por promover a mobilidade, a saúde, a sociabilidade ou a defensa do comercio de proximidade.
Relacionadas:
-
Pontevedra énchese de mulleres que opinan e dan a súa propia visión do día a día nos medios de comunicación
Por Mónica Patxot & Anxo Lourido |
-
O "éxito" de Pontevedra, segundo Fernando Nebot, é que "no hay tensión" no uso do espazo público
Por Alejandro Espiño |
-
Expertos en creación analizan a cultura como motor das cidades
Por Mónica Patxot & Redacción |
-
Joan Clos dialoga con Lores sobre deseño urbano no inicio do ciclo 'Urbtopías'
Por Alejandro Espiño & Mónica Patxot |