![](/web/cache/scene/uploads/fotos/foto/_S7QytKoutjK3UsovKMnMzytWsi62MjawUqrKz891Lsov0DGzMN_/_AxNjDQSU7NK0kt0snNTEnJSVWyrgUA_/534c6c4f35a88-louzan-enerxia.jpg)
© Deputación de Pontevedra
Louzán: "Estamos en condicións de desperdiciar os postos de traballo de ENCE? Eu sinceiramente creo que non"
![Alejandro](/web/cache/scene/uploads/xornalistas/foto/dee/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/5624216432-20150128-patxot-alex-espino-002.jpg)
Por Alejandro Espiño
![](/web/cache/scene/uploads/fotos/foto/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/534c6c3dd2297-louzan-arregui.jpg)
© Deputación de Pontevedra
Lonxe de matizar as súas declaracións deste mércores, nas que aseguraba que o traslado de Ence era inviable, Rafael Louzán deu un paso máis con respecto ao seu apoio á pasteira. O presidente da Deputación, abordado polos xornalistas nun acto oficial, preguntouse se en Pontevedra e a súa comarca "estamos en condicións de desperdiciar os postos de traballo de Ence", ante o que se autocontestou cun rotundo "eu sinceiramente, creo que non".
"Ence está xerando emprego e riqueza en Pontevedra", insistiu Louzán. Recoñeceu que a empresa debe cumprir unha serie de cuestións medioambientais e cuestións "menores" como reducir o impacto visual e os seus cheiros, pero asegurou que "se iso se cumpre", as autoridades competentes, entre as que citou ao presidente da Xunta, Alberto Núñez Feijóo, e o Ministerio de Medio Ambiente, "avaliarán cal é a mellor solución".
En todo caso, o presidente da Deputación afirmou que "o importante en todo caso" é que a decisión sobre o futuro de Ence "está en Galicia". Reiterou que as propostas que se manexaban para o traslado "non son viables na actualidade por custo económico e operativo" e recordou que, malia que a concesión á empresa caduca en 2018, "non se debe esperar tanto tempo para tomar a decisión, sexa cal sexa".
Rafael Louzán, que repetiu en varias ocasións que "o importante é que Pontevedra necesita traballo para a xente", utilizou este mesmo argumento para criticar ao Concello de Pontevedra "porque en catorce anos en ningún momento dialogou coa empresa" e concretamente ao seu alcalde, Miguel Fernández Lores, ao que acusou de que "se lle enche a boca falando de xerar emprego e non creou nin un só metro cadrado de solo industrial en Pontevedra".
"Esa débeda a terá sempre o BNG de Pontevedra que non deron alternativa nin propuxeron nada para as miles de familias que pensan en buscar un emprego e non o atopan", concluíu o presidente provincial do PP. "Pontevedra é unha cidade que, desde o punto de vista industrial, non ten alternativa".
RUEDA INSISTE EN QUE A CONCESION CADUCA EN 2018
Pola súa banda, o vicepresidente da Xunta de Galicia, Alfonso Rueda, evitou pronunciarse este xoves sobre as declaracións de Rafael Louzán. En todo caso, insistiu en que se tomará tomar "entre todos" a mellor decisión sobre a factoría de ENCE en Lourizán, pero remarcou que a vixencia da concesión "caduca en 2018". Ante esta situación, precisa que a Xunta fará "un pronunciamento tendo en conta todas as circunstancias", entre as que aludiu ás medioambientais.
O PSOE PIDE AO PP QUE CESE A LOUZAN
O PSOE cre que Louzán "ridiculiza e deixa aos pés dos cabalos ao presidente da Xunta Núñez Feijoo e ao seu conselleiro Hernández"
Pero ao PSOE non lle gustou nada o dito polo presidente da Deputación. O deputado socialista e secretario local do partido en Pontevedra, Guillermo Meijón, afirma que "se desmonta a farsa que ata agora mantiña o PP respecto das súas pretensións sobre ENCE" e que as declaracións de Louzán "ridiculizan e deixan aos pés dos cabalos ao presidente da Xunta Núñez Feijoo e ao seu conselleiro Hernández".
O PP, e en concreto Núñez Feijoo, indica o deputado socialista, "tería que cesar de modo inmediato a Louzán se pretende que as súas votacións no Concello de Pontevedra e no Parlamento de Galicia favorables ao traslado da pasteira teñan credibilidade". Considera Meijón que "o contrario significaría que Núñez Feijoo e Hernández son artífices, xunto con Rajoy, dun gran engano a Galicia utilizando ao parlamento galego como instrumento electoral a sabendas de que mentían".
Meijón subliña ademais que "as declaracións de Louzán producíronse un día antes de que o PP ratifique no Congreso a nova Lei de Costas de Cañete e Rajoy". A este respecto, lamenta que "a lei de Costas do PP está confeccionada contra os intereses de Galicia". Asegura que "é unha lei que non soluciona o grave problema dos nosos núcleos costeros tradicionais senón que os utiliza para garantir 75 anos máis a ENCE".