Eduardo Barros segue como vicepresidente da Cámara de Comercio e Lucía Pedroso entra como vogal
Por Natalia Puga
O ex presidente da extinta Cámara de Comercio de Pontevedra Eduardo Barros mantense como representante da capital no novo pleno da fusionada Cámara de Pontevedra, Vigo e Vilagarcía. Tras a fusión das tres entidades camerais foi elixido vicepresidente e agora, no pleno constituído tras as primeiras eleccións da entidade fusionada, segue no cargo.
A sesión constitutiva do novo pleno da Cámara, formada por 60 membros, celebrouse este venres e estivo presidida pola directora xeral de Comercio, Sol María Vázquez Abeal, e o secretario xeral da institución, Manuel Fernández Pool. Había unha única candidatura rexistrada, de modo que se evitou un proceso de votación.
José García Costas foi elixido presidente e José Manuel Fernández Alvariño, Javier Touza Touza e Eduardo Barros Pereira ocuparán as tres vicepresidencias da nova institución cameral. A tesoureira é María José Táboas Cabral.
Entre os vogais figura a ex presidenta da Asociación de Jóvenes Empresarios de Pontevedra, Lucía Pedroso Suárez. Ademais, repite o director territorial do Grupo Ence, Antonio Casal Lago. A lista e vogais complétase con Delfina Cendón Orge, Ramón Víctor Correa Fernández, Ignacio Selecto Hernández e Santiago Novoa García.
A Cámara Oficial de Comercio, Industria, Servizos e Navegación de Pontevedra, Vigo e Vilagarcía de Arousa, está formada por máis de 80.000 empresas dos 55 concellos que compoñen a súa demarcación. O organismo, que ten a súa sede principal en Vigo, conta con puntos de atención ao público nas oficinas de Vilagarcía de Arousa e Pontevedra, así como as antenas camerais de Gondomar e Salvaterra do Miño.
Cabe lembrar que a Cámara de Pontevedra, Vigo e Vilagarcía é o único ente cameral fusionado desde a entrada en vigor da nova Lei 4/2014, do 1 de abril, Básica das Cámaras Oficiais de Comercio, Industria, Servizos e Navegación.