O BNG leva ao Parlamento a vía verde entre Pontevedra e Arcade
Por Redacción
O deputado nacionalista Luís Bará presentou este venres unha proposición non de lei para que o goberno galego demande ao Ministerio de Fomento a reconversión en vía verde para uso peonil e ciclista dos treitos da antiga vía férrea entre Pontevedra e Arcade actualmente en desuso.
Na iniciativa do BNG tamén se solicita a colaboración da Xunta para a redacción do proxecto e a xestión e conservación da senda.
A proposta xa foi aprobada polos plenos de Pontevedra, Vilaboa e Soutomaior e conta tamén co apoio de asociacións veciñais e de fomento da bicicleta.
Actualmente, parte da vía férrea entre Arcade, á altura da ponte sobre o río Verdugo, e a estación de Pontevedra deixou de ter uso para o transporte ferroviario de pasaxeiros e mercadorías. Concretamente, o treito entre Arcade e Figueirido presenta un estado de grave abandono e nalgúns puntos está completamente invadido pola maleza.
A transformación desta antiga vía nunha senda verde para uso peonil e ciclista permitiría crear unha nova infraestutura de aproximadamente dez quilómetros, aproveitando o trazado da vía férrea agora en desuso.
No caso do treito entre Arcade e Figueirido, o aproveitamento do antigo trazado sería doado xa que discorre completamente separado do novo trazado do TAV. No caso do treito Figueirido-Pontevedra caben dúas opcións: transformar en vía verde a antiga vía férrea, ou aproveitar as vías de servizo paralelas ao trazado do Tren de Alta Velocidade.