A Garda Civil desmantela un invernadoiro de marihuana en Portas
Por Redacción
A Garda Civil detivo a M.M.S., de 47 anos, veciño de Portas, como presunto autor dun delito contra a saúde pública por cultivo e elaboración de drogas nun invernadoiro próximo á súa vivenda.
Segundo informaron fontes oficiais do instituto armado, as investigacións levadas a cabo durante as últimas semanas polo equipo de investigación da Garda Civil de Vilagarcía de Arousa, en colaboración cos efectivos do posto de Caldas de Reis, corroboraron as sospeitas de que un veciño do municipio de Portas dedicábase ao cultivo de marihuana nunha leira próxima ao seu domicilio.
Cos indicios obtidos na fase de investigación, a Garda Civil procedeu á inspección da leira sobre as que recaían as sospeitas e así puido localizar un invernadoiro de estrutura metálica dedicado en exclusiva ao cultivo de marihuana.
No interior do invernadoiro contabilizáronse un total de 42 plantas de marihuana, todas elas nun avanzado proceso de crecemento, con 2,5 metros de altura, as cales, unha vez arrincadas e esfolladas, arroxaron un peso de 78 quilos.
O dono e responsable da plantación, que foi detido, acusado dun presunto delito contra a saúde pública, foi posto en liberdade e deberá comparecer, cando sexa citado, ante o xulgado de instrución de garda de Caldas de Reis, que entende do caso.
As plantas incautadas, unha vez postas a disposición da autoridade xudicial, serán entregadas nas dependencias de Sanidade Exterior para a súa análise e pesada.