A Garda Civil de Montaña de catro comunidades prepárase para o verán en montes de Pontevedra
Por Redacción
Un total de 25 efectivos dos Grupos e Equipos de Rescate e Intervención en Montaña da Garda Civil chegados de Galicia, Asturias, Cantabria e León adéstranse estes días en Pontevedra para prepararse de cara o verán.
As actividades forman parte do Plan de Instrución Estival do Servizo de Montaña da Garda Civil, que ten por obxecto actualizar e perfeccionar as técnicas relacionadas coas súas actividades, sobre todo nos supostos de rescate de persoas accidentadas en ambientes de montaña.
Segundo informou a Garda Civil, as actividades comezaron esta semana e xa estiveron facendo prácticas nun barranco do municipio de Ponte Caldelas e nas illas Cíes. A este segundo emprazamento acompañounos o Servizo Marítimo e realizaron marchas topográfias, á vez que probaron os últimos medios tecnolóxicos adquiridos para o medio acuático.
Os 25 efectivos participantes pertencen aos Grupos e Equipos de Rescate e Intervención en Montaña de Cangas de Onís e Mieres (Asturias), Potes (Cantabria), Sabero (León) e Pobra de Trives (Ourense), coordinados e dirixidos polo oficial xefe da Sección de Rescate e Intervención en Montaña (SEREIM) de Cangas de Onís.