Piden permiso para unha manifestación o Venres Santo polas melloras no PAC de Baltar
Por Redacción
Medio cento de persoas acudiu o pasado xoves a unha reunión convocada pola Plataforma Veciñal Sanxenxo en Marcha para explicar a situación actual do servizo no Punto de Atención Continuada (PAC) de Baltar.
Representantes dunha ducia de asociacións do municipio acudiron á cita, na que un pediatra xubilado do centro de saúde de Portonovo informou dos puntos para mellorar na instalación.
Entre esas cuestións atópase a non cobertura das vacantes por xubilación ou baixas no persoal, que afectan o servizo que se presta aos pacientes.
A plataforma solicita ao Sergas que se destinen tres pediatras a Baltar, dous de mañá e un de tarde, para contar cun servizo continuado de 8:00 a 22:00 horas. Ademais critica que durante o verán, cando Sanxenxo duplica a súa poboación, o aumento no persoal se limite "a dous médicos e unha enfermeira" e tamén o feito de perder a ambulancia medicalizada que contaba coa súa base no municipio durante todo o ano cando se creou o 061.
Por todo iso Sanxenxo en Marcha decidiu continuar cunha recollida de sinaturas e solicitar permiso á Subdelegación do Goberno para realizar unha manifestación de protesta o vindeiro venres 14 de abril ás 12:00 horas con saída desde o Concello atravesando Silgar e concluíndo ante o centro de saúde de Baltar.
Relacionadas:
-
Os usuarios do PAC de Baltar quéixanse pola avaría do aparato de raios X
Por Oskar Viéitez |
-
Manifestación veciñal para esixir a mellora do servizo no centro de saúde de Baltar
Por Redacción |
-
Sanxenxo reclama unha ambulancia medicalizada e melloras en Pediatría
Por Redacción |
-
Solicitan ao Sergas unha ambulancia medicalizada e un pediatra de urxencias para Portonovo
Por Redacción |