A parada técnica de ENCE xerou un total de 2.100 pernoctas na cidade
Por Oskar Viéitez
Ence asegurou que, coas actuacións de mantemento acometidas durante a súa parada técnica anual, xerou "un total de 2.100 pernoctas na cidade", así como "un inxente movemento económico" durante toda a semana.
Nun comunicado, a planta indicou que comeza a recuperar a normalidad trala parada técnica anual, durante a que 870 traballadores, dos que 250 procedían de Pontevedra e comarca, desenvolveron tarefas de mantemento. Ence concretou que outros 105 traballadores forman parte de 14 empresas da provincia. O resto son compañías procedentes do resto de Galicia, Asturias, do resto de España, de Portugal e de Suecia.
Boa parte dos traballos da parada técnica centráronse na incorporación de novas tecnoloxías para "eliminar a estela de vapor de auga". Estas melloras teñen un orzamento de 4 millóns de euros.
Aínda que os resultados "comezarán a apreciarse nos próximos días, non poderán ser advertidos totalmente ata o mes de maio", sinalou a empresa, que asegurou que a partir dese momento a estela de vapor verase "un número mínimo de días".