A comarca de Pontevedra, protagonista en Fitur
Por Alejandro Espiño
Pontevedra deixou pegada en Fitur. A presentación do Camiño Portugués pola costa, oferta turística elixida este ano pola Deputación, levou á Feira Internacional de Turismo a beleza das Rías Baixas e os "innegables atractivos" que, segundo Carmela Silva, poden ofrecer os municipios da comarca aos seus visitantes.
Nesta presentación participaron, entre outros, representantes dos concellos de Pontevedra, Soutomaior, Vilaboa, Barro, Portas, Caldas de Reis, Valga e Pontecesures.
Carmela Silva destacou o "hermosísimo" centro histórico de Pontevedra, o castelo de Soutomaior, o parque natural da Barosa (Barro) ou a aposta termal de Caldas de Reis como "enclaves de visita obrigada" para os turistas que se animen a percorrer esta nova ruta do camiño de peregrinación a Santiago.
A concelleira de Turismo en Pontevedra, Anabel Gulías, destacou que esta aposta da Deputación polo Camiño Portugués permite aos concellos buscar "novas vías e reclamos" para promocionalo como "gran activo" turístico e económico.
DETALLES DA PRESENTACIÓN
A presentación, que foi conducido pola xornalista Nieves Rodríguez, apoiouse en pezas audiovisuais e empregou a realidade aumentada para dar a coñecer en 3D os recursos turísticos das Rías Baixas, que estarán dispoñibles mediente a app Rías Baixas RA.
Así, presentouse o caderno de viaxe da Deputación que recolle as etapas do Camiño Portugués pola costa e os principais enclaves que os peregrinos poden vistar entre A Guarda e Pontecesures. Nelas, ofrécese información sobre a distancia, o desnivel, os abergues, onde marcar a credencial ou os principais recursos turísticos da ruta.
Ademais, estreouse o vídeo promocional Reasons to come to Rías Baixas, que ten como protagonista a un peregrino inglés que transmite as razóns que motivaron a elección desta ruta e que destaca, por encima de todo, o feito de ser o único dos camiños que pasa á beira do mar e o notable patrimonio artístico, histórico e natural que atravesa.
O acto concluíu coa interpretación do músico Teo Cardalda do tema Un lugar no mundo, composto para esta presentación.
Relacionadas:
-
"Espectacular" experiencia de Turismo Rías Baixas en Fitur
Por Oskar Viéitez |
-
As Q de calidade ás Rías Baixas entréganse en Madrid co gallo de Fitur
Por Redacción |
-
As Rías Baixas pasearán en autobús por Madrid
Por Redacción |
-
Carmela Silva e Susana Díaz estreitan lazos en Fitur
Por Redacción |
-
Os ecos de Cambados como Cidade Europea do Viño chegan a Fitur
Por Redacción |
-
O Camiño pola Costa viaxa a FITUR coa voz do músico Teo Cardalda
Por Redacción |