Ingresan en prisión catro dos detidos nunha operación de tráfico de drogas
Por Oskar Viéitez
O xuíz titular do Xulgado de Instrución número un de Vilagarcía de Arousa ordenou o ingreso en prisión provisional comunicada e sen fianza de tres persoas, dous homes e unha muller, detidos o pasado mércores nunha operación a nivel nacional contra o tráfico de drogas desenvolvida este martes. Ademais deixou en liberdade a outro dos arrestados.
Paralelamente, segundo informaron desde o Tribunal Superior de Xustiza de Galicia (TSXG), dous dos seis detidos pasaron a disposición xudicial na mañá deste xoves no xulgado de Padrón, que decretou o ingreso en prisión comunicada e sen fianza para un deles e liberdade provisional para o outro.
Todos eles están investigados por un delito de tráfico de drogas.
O resto dos detidos en territorio nacional pasaron a disposición xudicial, un en Madrid, outro en Almería e catro máis en Cartaxena. Estes catro últimos foron tamén enviados a prisión provisional.
Durante o operativo, que se desenvolveu de forma simultánea en varias provincias españolas, foron detidas 12 persoas por tráfico de drogas. Ademais das detencións, practicáronse varios rexistros con motivo da investigación, que foi declarada segreda.