Ponte Caldelas sumarase á rede galega de praias sen fume
Por Redacción
A praia fluvial da Calzada, en Ponte Caldelas, sumarase á rede galega de praias sen fume que impulsa a Consellería de Sanidade da Xunta de Galicia dentro das súas medidas contra o consumo de tabaco. O Concello limitarase a informar, coa colocación de carteis nas inmediacións do areal, pero non imporá ningún tipo de sanción.
A Xunta de Goberno local aprobou este luns a medida, unha proposta do alcalde, Andrés Díaz, para poñer fin ao fume de tabaco e á suciedade das cabichas. O próximo paso será comunicar a decisión á Consellería de Sanidade. Na provincia de Pontevedra xa hai once praias adheridas, polo que a da Calzada será a duodécima. Ponte Caldelas será, ademais, o sexto municipio pontevedrés en entrar na campaña.
O Concello instalará un cinceiro para que os fumadores non accedan ao espazo cos cigarrillos acendidos. "Será unha recomendación educativa e a prol da saúde, non só porque estamos nun espazo de valor natural no que hai que manter hábitos saudables e sostibles, senón porque A Calzada é un lugar que está cheo de nenos e rapaces", explicou o alcalde.
Os concelleiros dos tres grupos municipais que compoñen o goberno local (PSdeG-PSOE, AVP e BGN) coincidiron en que debe subliñarse que se trata dunha recomendación que vai na liña do respecto ao entorno natural e de concienciación social, pois as cabichas son residuos escasamente biodegradables que tardan 10 anos en desaparecer e conteñen sustancias tóxicas como a nicotina ou o alquitrán.
Segundo informa o Concello, a Xunta de Goberno tivo en conta que a Asociación pola Educación Ambiental e do Consumidor (ADEAC), entidade que xestiona a concesión das bandeiras azuis, está a considerar incluír a prohibición de fumes de tabaco como un dos requisitos para a renovación destas insignias medioambientais. A praia da Calzada é a única de interior que conta con este distintivo en toda España.
Relacionadas:
-
Licitan a explotación do quiosco da praia fluvial da Calzada
Por Redacción |
-
Prohibiría fumar na praia?
Por Oskar Viéitez |
-
As praias das Rías Baixas 'colleitan' as súas bandeiras azuis
Por Redacción |
-
A contorna da praia da Calzada xa está "en perfecto estado" de cara ao verán
Por Redacción |
-
As praias pontevedresas presumen de bandeiras azuis con Sanxenxo á cabeza
Por Oskar Viéitez |