Quen debe máis dun millón de euros a Facenda? Consulte aquí a lista de morosos de Pontevedra e comarca
Por Redacción
A listaxe de grandes morosos que teñen débedas pendentes e sancións por valor superior a un millón de euros coa Axencia Tributaria volve incluír a empresas e particulares de Pontevedra e as comarcas próximas. Publicáraa por primeira vez o Ministerio de Facenda no mes de decembro de 2015 e volveu a actualizarse este xoves 30 de xuño. Entre ambas as listas de debedores hai seis meses de diferenza, pero apenas diferenzas no que afecta a particulares e empresas pontevedresas.
Esta segunda lista de morosos recolle os datos relativos a débedas pendentes e sancións de máis dun millón de euros que non se pagaron a data 31 de decembro de 2015, o que supón que existe a posibilidade de que a día de hoxe haxa debedores que xa cumpriron coas súas obrigacións co fisco.
No caso das empresas e particulares pontevedreses, non hai ningunha incorporación á lista con respecto a hai seis meses, pero si existen cambios no importe adebedado, tanto de firmas que reduciron a cantidade de diñeiro como doutros que deben agora mesmo máis que hai medio ano. De todos os xeitos, a maioría conservan a súa morosidade.
Entre quen reduciu a súa débeda co fisco destacan Clesa, en Caldas de Reis, que debía na lista de decembro 6.723.394 euros e agora 6.711.931; e Sercoysa Proxectos e Obras, que pasou de 3.490.400 a 3.458.398. No lado oposto, o de empresas que aumentaron o importe do diñeiro que debe a Facenda, figura a área de Servizo Praceres, que pasou de 1.125.910 a 1.173.083 euros.
O resto das empresas segue en niveis iguais de endebedamento no novo documento de morosos: Irmáns Malvar Vázquez Construcións, que subiu de 2.383.043 euros), Comercial Senra (2.083.038 euros), Taelpo Telecom (2.183.162 euros), Pirsa O Grove (1.112.406 euros), Indeza Edificación e Obra Civil (1.771,507), Gasóleos do Lérez (1.232.566 euros), Gasóleos de Caldas (1.053.682 euros), Promociones Gómez Leiro (1.041.518 euros), Construcción Hnos Padín Cambados (3.024.732 euros) ou Construcciones e Instalaciones Cotobad (1.769.634 euros).
Ademais destaca a presenza en canto a persoas físicas do avogado Manuel Franco Argibay, que recentemente se soubo que retomou a súa actividade como letrado en Pontevedra tras a súa época fuxido da Xustiza e posteriores condenas por branqueo de capitais e estafa. A súa débeda segue intacta na nova listaxe, 1.587.340 euros.
Consulta aquí a lista completa.