Identifican oito motoristas que realizaban carreiras ilegais en Armenteira
Por Oskar Viéitez
Na tarde do pasado sábado, día 25, varias chamadas de veciños da zona de Armenteira, termo municipal de Meis, alertaron á Garda Civil do Subsector de Tráfico de Pontevedra sobre a posibilidade de que se estivesen realizando carreiras ilegais de motocicletas na estrada de Ribadumia a Armenteira.
Segundo informaron fontes oficiais da Garda Civil, unha patrulla do Subsector trasladouse ao lugar e comprobaron que se trataba dun grupo de motoristas que estaba a circular a gran velocidade pola citada vía.
Ademais facíano "de forma continua e en grupos", e segundo aseguran desde o Instituto Armado "poñendo en risco a súa vida e a dos demais usuarios".
Os axentes identificaron e denunciaron oito motoristas, todos eles veciños da zona, por unha infracción grave ao regulamento de seguridade viaria (condución temeraria).