O persoal de Linorsa en Pontevedra baralla convocar folga ante os atrasos e impagos de salarios
Por Redacción
Un grupo de traballadoras de Linorsa, concesionaria da limpeza en numerosas institucións públicas galegas, que desenvolven o seu labor no Virxe Peregrina de Pontevedra interromperon a primeira hora da mañá deste martes a xuntanza que mantiña o persoal do centro coa Xerencia para denunciar os continuos atrasos e impagos no cobro de salarios e anunciar a posibilidade dunha convocatoria de folga.
"O persoal xa non aguanta máis esta situación e decidiu entrar na xuntanza para advertir que o servizo poderá verse afectado, xa que dende a Xerencia se nos dixo que non podían facer nada mentres o servizo non se vise afectado", indican dende a CIG-Servizos.
As afectadas accederon á xuntanza portando cartaces nos que reclaman unha solución ao conflito e aproveitaron para explicarlles a súa problemática ao resto do persoal do centro. "Fomos á reunión porque era para traballadores do centro, e nós tamén o somos", sinalaron as empregadas de Linorsa.
Segundo explican, o director médico, presente na xuntanza, asegurou descoñecer o problema e adiantoulles que llo transmitirá á Xerencia.
Dende CIG-Servizos lembran que a central xa mantivo unha reunión co xerente, que lles dixo que non poden facer nada até que o servizo de limpeza se vexa afectado. Diante disto, o persoal de Linorsa baralla a posibilidade de convocar folga para reclamar o pago dos salarios e dos atrasos pendentes.
Relacionadas:
-
Preocupación no persoal de Linorsa tras a entrada da empresa en concurso de acredores
Por Redacción |
-
O Concello rescindirá o contrato con Linorsa para a limpeza do Multiusos da Xunqueira
Por Alejandro Espiño |
-
As traballadoras de Linorsa esixen unha solución aos deputados provinciais ante a falta de pagamentos da empresa
Por Oskar Viéitez & Mónica Patxot |
-
A Deputación apoia e defende como "xustas" as demandas das traballadoras de Linorsa
Por Redacción |
-
As limpadoras dos centros de saúde concéntranse con medo ao impago da nómina deste mes
Por Redacción |