E o 1 de febreiro... o Savoy tampouco abriu
Por Anxo Lourido
A cafetaría Savoy leva un mes pechada, cos cristais da planta baixa tapados con papel e sen ningún tipo de actividade no seu interior. Os carteis que se poden ler na fachada, dirixidos aos clientes, apuntan a que o peche durante o mes de xaneiro é motivado "por vacacións".
Durante esta mañá do 1 de febreiro recuperouse a actividade, de novo, no establecemento pero sen abrir as súas portas. Un par de empregadas facían tarefas de limpeza. Aseguran que non teñen unha data concreta para reabrir o local. "A nosotras nos han dicho que teníamos que volver a instalar todo para una futura reapertura" afirman entre un balbordo de caixas de bebidas amoreadas arredor da entrada do establecemento. "Suponemos que abriremos en quince días pero no sabemos nada concreto", afirman as empregadas. O local pechara sorprendentemente o 1 de xaneiro, en pleno período de Nadal cando se podería agardar maior actividade na cafetaría situada fronte á Praza da Ferraría.
As traballadoras afirman que son moitos os clientes que as pararon estes días pola rúa para preguntarlles polo futuro da cafetaría pero "nosotras seremos las últimas en enterarnos" di, lamentándose, unha delas.
Comerciantes da zona aseguran que ao empresario que xestionaba o negocio non lle estaban a ir ben as cousas, "debía dinero" sentenza un.
Cafetería "delicatessen"
O local fora recuperado polo promotor madrileño, José Ángel Francisco Araújo, quen o 1 de setembro de 2011 reabría o establecemento ao público despois de oito anos pechado e un período de incerteza que concluíu coa apertura dun expediente disciplinario dende o Concello que o obrigaba a executar as obras de rehabilitación do edificio ante o ruinoso estado que presentaba. Segundo transcendera por fontes municipais, dende o verán de 2007 este empresario pagaba 6.000 euros polo aluguer do histórico local.
A nova proposta de Francisco Araújo, con quen PontevedraViva intentou contactar en repetidas ocasións sen éxito, centrouse en converter o espazo nunha cafetaría "delicatessen" con diferentes actividades como degustación de capuccinos ou catas de viños promovidas dende a súa páxina en Facebook.
Diferentes profesionais da hostalaría indican que a aposta foi arriscada e que non chegou a callar nunha cidade como Pontevedra, acostumada a unha cafetaría clásica cunha historia inicial que se remonta a 1936 e que, ao longo dos anos, se converteu en lugar de encontro de pintores e escritores como Pesqueira, Laxeiro, Celso Emilio Ferreiro ou Virgilio Novoa.
Polo momento, haberá que esperar dúas semanas máis para saber se o aroma cafeteiro regresa á Praza de Ourense.