O acusado de matar un home e disparar a outro en Moaña defende a súa inocencia
Por Mónica Patxot & Natalia Puga
Jesús J.R.C., coñecido como O Briso, declarouse este martes non culpable dos delitos de homicidio, homicidio en grao de tentativa e tenencia ilícita de armas dos que o acusaban por presuntamente disparar a dous homes que acudiran á súa casa de Moaña, provocando a morte dun e deixando ferido ao outro. O home non quixo declarar durante o xuízo celebrado na Sección Segunda da Audiencia Provincial de Pontevedra, pero si asegurou que non se consideraba autor dos feitos dos que o acusaba a Fiscalía e polos que se enfronta a 23 anos e medio de prisión.
A pesar de que o acusado non quixo declarar, si saíu á luz durante o xuízo cal é a súa visión dos feitos. Os axentes da Garda Civil que o atenderon despois da súa detención o 5 de xaneiro de 2013 indicaron, durante a súa declaración ante o tribunal, que o acusado lles relatou que disparara aos dous individuos, pero que o fixera "en defensa propia", pois acudiran á súa casa a "cobrar una deuda" con pasamontañas e un coitelo.
Segundo saíu á luz durante o xuízo, o acusado decidiu entregarse a través do seu cuñado horas despois do crime unha vez que xa sabía que o estaban buscando como presunto autor dos disparos. O seu familiar contactou cun axente e díxolle que el estaba no coche e quería falar con algún dos investigadores. Nese momento, contoulle que os dous homes acudiran á súa casa de madrugada -sobre as 3.30 horas-, chamaron varias veces e, cando abriu, tentaron agredilo e el defendeuse.
Este relato reiterouno tanto por teléfono a algún amigo como a outros axentes e asegurou que temía pola súa vida, aínda que non con estas palabras exactas, pero si que que pensaba que lle ían a matar, pois ían coa o cara tapada e estaban armados. Á beira do cadáver que quedou tirado nas proximidades da súa casa apareceu un coitelo, pero nunca chegou a localizarse a arma do crime, a pesar de que o acusado indicou que tirara a pistola ao mar.
O xuízo, que seguirá o vindeiro xoves, incluíu na súa primeira sesión a declaración de F.M.G., o home ao que presuntamente deixou ferido. Tras o incidente, no que el recibiu un disparo, acudiu ao cuartel da Garda Civil para pedir axuda. Na súa declaración ante o tribunal este martes, recoñeceu que foi xunto ao falecido a "reclamarle algo" e o acusado acabou disparándolles, no seu caso, cando xa fuxía cara ao coche.
Na súa declaración, asegurou que non houbo discusión nin forcexo, só disparos. Recoñeceu que o coitelo que apareceu xunto ao cadáver do seu compañeiro era seu, pero matizou que o usaba "para pescar" e xustificou que levaban unha braga náutica que lles tapaba a cara porque "hacía mucho frío" aquel día, o 5 de xaneiro de 2013.
Os investigadores barallan que todo ocorreu entre as 3.00 e as 3.30 horas da madrugada e as horas coinciden co declarado por un veciño da zona que escoitou ata sete disparos e, cando saíu á xanela, viu un cadáver no chan. Ademais, a partir desa hora, o acusado realizou varias chamadas telefónicas a varios amigos nas que os gardas civís aseguran que chegou a relatar que dous ou tres homes acudiron á súa casa, tentaron atracarlle e el, en lexítima defensa, disparoulles. Eses amigos non o confirmaron este luns durante o xuízo.