Marea Branca confía en que Monte Carrasco "non irá arriba" ante o "fracaso" do hospital de Vigo
Por Redacción
A realidade do novo hospital de Vigo, no centro de todas as críticas sociais e políticas nas últimas semanas, "nos da a razón", segundo un dos portavoces da Marea Branca en Pontevedra, Fernando Míguez, en que "estaba máis que xustificada" a súa defensa da sanidade pública e o seu rexeitamento frontal á privatización da súa xestión. Así o sinalaron nunha nova concentración que se celebrou este domingo na praza da Ferrería.
Unha trintena de persoas secundaron esta protesta, que tivo que abandonar o seu tradicional escenario, a praza da Peregrina, polo paso da Volta a Galicia. "Temos que defender o noso dereito a ter unha sanidade pública tanto os usuarios como os profesionais, porque hai xente que non está pola labor", afirmou Fernando Míguez, médico na área sanitaria pontevedresa.
Tal foi o "fracaso" do Álvaro Cunqueiro, segundo este portavoz, que os membros da Marea Branca están convencidos de que o proxecto de Monte Carrasco xamais será unha realidade. "É un investimento de moitos cartos, nun momento de crise e sen xustificación ningunha", sinalan os integrantes deste colectivo, "e os sucesos de Vigo nos animan a estar convencidos de que esa non é a liña a seguir".
Míguez lembrou que a razón de poñer en marcha este novo hospital é para "dar opción a que entre o capital privado" na xestión da sanidade pontevedresa, polo que celebra que "ese hospital nunca vaia ir arriba".
Desde Marea Branca insisten en que o máis adecuado é ampliar o actual hospital de Montecelo ao que "só lle faltaba un chanzo para completalo e con moito diñeiro metido xa". Entenden que a Xunta debería "afinar toda a dotación" e incluír no seu plan hospitalario diversas especialidades das que carece actualmente a área sanitaria norte da provincia. Se iso se produce, din, converteríase nun centro "válido" para a poboación á que atende actualmente.
Relacionadas:
-
A Marea Branca considera o Hospital de Monte Carrasco un proxecto obsoleto
Por Anxo Lourido |
-
SOS Sanidade Pública sae á rúa para evitar que Pontevedra se convirta noutro Álvaro Cunqueiro
Por Redacción |
-
O conflito do Hospital Álvaro Cunqueiro repercute negativamente nos pacientes de Pontevedra
Por Mónica Patxot & Oskar Viéitez |
-
O Colexio de Médicos de Pontevedra pide unha reconsideración da política de traslados ao novo Hospital de Vigo
Por Redacción |
-
Carmela Silva, con respecto a Monte Carrasco: "Nin en Pontevedra nin en Vigo nin en Vilagarcía, non aos hospitais privados"
Por Alejandro Espiño |