A peonalización diante do Hospital Provincial afectará tamén a Casimiro Gómez
Por Natalia Puga & Cristina Saiz
As obras para crear unha gran praza pública peonil diante do Hospital Provincial están xa á volta da esquina. A mesa de contratación reuniuse a semana pasada para decidir entre as ofertas presentadas para executar as obras e decidiuse a súa adxudicación á firma Covsa por 335.429,30 euros.
A voceira do Goberno local, Carme da Silva, anunciou este luns, tras a Xunta de Goberno, que, tal e como foron adxudicadas as obras, supoñerán unha mellora importante no proxecto. A empresa Covsa ofreceu como melloras facer actuacións na rúa Casimiro Gómez, de modo que ese vial queda incluído na zona a mellorar.
O proxecto saíra a licitación por 417.778,81 euros e finalmente adxudicouse por 82.349,51 euros menos e ampliando a zona de actuación. O proxecto inicial planeaba crear unha nova praza de 1.200 metros cadrados peonalizando o tramo comprendido entre a rúa Cobián Areal e a entrada ao servizo de Urxencias do Hospital Provincial.
O Concello calculaba que o procedemento de contratación se iniciaría no mes de xuño e as obras terían un prazo de execución de tres a catro meses, de tal forma que esta adxudicación implica que o proxecto avanza "dentro do prazo". Prevese que a praza estea rematada antes de que finalice o ano 2015.
A actuación afectará con obxectivo de crear un espazo de preferencia peonil, plataforma única, plantación de árbores e novo mobiliario urbano. Esta transformación urbana levará aparellada cambios na circulación do tráfico en todo este ámbito.
OBRAS EN MOURENTE
A Xunta de Goberno local tamén adxudicou as obras de rehabilitación e mellora da estrada N-541 en Mourente. A actuación adxudicouse por 234.083,37 euros á empresa E.C. Casas, que ofrece, como melloras, a instlación de tres lombos.
Ademais, decatouse de que avanzan a bo ritmo as obras de construción do centro social de Salcedo, adxudicadas por un importe total de 708.455 euros. Están "moi avanzadas" e Carme da Silva prevé que "non lle queda moito" para que o edificio estea rematado e poida entrar en funcionamento.
Relacionadas:
-
O Concello elixe lousas ecolóxicas para a nova praza diante do Hospital
Por Redacción |
-
Arrincou a construción da praza do Hospital Provincial
Por Mónica Patxot |
-
As obras da nova praza diante do Provincial, en marcha a partir do luns
Por Redacción |
-
Médico Ballina e o ámbito dos centros de saúde da Parda e Monte Porreiro, en obras antes de final de ano
Por Alejandro Espiño |
-
Doce empresas optan á obra para peonalizar a fronte do Hospital Provincial
Por Natalia Puga |
-
Crearán unha gran praza pública e peonil en Loureiro Crespo, diante do Hospital Provincial
Por Alejandro Espiño |