Deteñen dous homes por roubar a persoas maiores diñeiro que acababan de sacar do banco
Por Redacción
Dous homes de 32 e 39 anos de idade, ambos os dous naturais de Romanía, con domicilio na Coruña, con antecedentes policiais, foron detidos en Pontevedra por axentes da Policía Nacional como presuntos autores dun delito de furto.
Segundo fontes oficiais da Comisaría Provincial de Pontevedra, os feitos tiveron lugar o día 4 de maio, cando presentaba unha denuncia nesas dependencias unha veciña de Pontevedra pola subtracción de 500 euros.
Na súa denuncia explicou que lle subtraeron do interior do bolso unha libreta bancaria dentro da cal metera o diñeiro. Os feitos aconteceron no interior dun establecemento comercial cando se encontraba na liña de caixas e se ben notou un contacto no seu bolso, non lle deu importancia ata que se dispuxo a pagar e comprobou que lle faltaba o diñeiro.
A denunciante, ao abrir o bolso comprobou que lle faltaba a libreta do banco cos 500 euros que acababa de retirar nunha sucursal bancaria da cidade.
A raíz da denuncias iniciáronse as investigacións para descubrir a identidade dos presuntos autores do delito analizando o "modus operandi" empregado: Os autores de furtos ao descoido realizan nun primeiro momento unha vixilancia exterior e interior dunha ou varias entidades bancarias, nalgúns casos facéndose pasar por clientes ou realizando algunha xestión.
Elixen a vítima, preferentemente muller e de avanzada idade
Elixen a vítima, preferentemente muller e de avanzada idade. Comproban que retirase unha cantidade importante de diñeiro. Fan un seguimento da vítima xa no exterior da sucursal bancaria. Buscan o momento propicio para a comisión do furto: portal da vivenda, ascensor, supermercado etc. preguntando por calquera cousa, acurralándoa en espazos pequenos ou creando confusión, tropezando a propósito coa persoa, vítima do furto, para introducir con grande habilidade a man no peto ou bolso onde leve gardado o diñeiro e subtraelo. Ese é, segundo a Policía, o seu modus operandi.
Unha vez cometido o furto os autores fóxense por separado encontrándose nun punto xa acordado previamente. Ademais estes delincuentes cambian continuamente de localidades empregando sempre a mesma forma de comisión de feitos delituosos.
Tras arduas xestións os axentes da Policía lograron identificar dous dos individuos con antecedentes policiais por feitos similares, detectados en Pontevedra, Marín, A Coruña, Santiago de Compostela, Vilagarcía de Arousa, entre outras localidades.
Unha vez identificados, axentes da Comisaría de Pontevedra procederon á detención de ambos os dous os días 18 e 19 de maio respectivamente por un delito de furto.