200 persoas participan no Congreso Galego Portugués de Psicoloxía do Deporte
Por Redacción
A preparación psicolóxica constitúe un piar básico para o rendemento deportivo, a partir desta idea desenvólvese o IV Congreso Galego Portugués de Psicoloxía do Deporte no que se debate sobre os beneficios para a sociedade que se establecen entre psicoloxía e deporte.
Durante estas xornadas, ao redor de 200 persoas, entre alumnos e expertos procedentes de España e Portugal, participan ata este venres na Escola de Enxeñería Forestal para dar visibilidade a unha materia que, segundo a organización, se pode converter nunha referencia no mundo do deporte nun futuro.
As xornadas están organizadas pola Sociedade Iberoamericana de Psicoloxía del Deporte (SIPD) en colaboración coa Universidade de Vigo e o Centro Libredón. O secretario xeral para o Deporte da Xunta de Galicia, José Ramón Lete Lasa, inaugurou o acto co alcalde de Pontevedra, Miguel Anxo Fernández Lores e a deputada provincial, Begoña Estévez.
Nas charlas e mesas redondas participan expertos, adestradores e deportistas, ademais de ter espazo para as intervencións dos estudantes que presentan preto de 50 traballos durante o congreso, entre os que figuran os 15 que realizaron en grupo 73 alumnos da Facultade de Ciencias da Educación e do Deporte.
Nesta primeira xornada incidiuse, segundo reflicte Eduardo Muñiz no DUVI, na relación entre os adestradores e os psicólogos avogando por un maior entendemento entre ambas as dúas figuras a través dunha comunicación fluída que permita compartir toda a información relacionada co rendemento do deportista.