Baixos prezos para a ameixa despois de tres semanas sen marisqueo
Por Redacción
A lonxa de Campelo subastou este venres un total de 1.995,5 quilos de molusco recollido polas mariscadoras da pé no Ameixal, en Lourido, e 157 quilos dos da flote na zona de Aguillóns.
A ameixa japónica vendeuse a un prezo entre os 5 e 6 euros o quilo, a fina entre os 17 e 20 euros por quilo, mentres que a variedade babosa da que só se recolleron 4 quilos se compraron a 8 euros. Polo berberecho pagouse 5,40 euros o quilo.
Son prezos por debaixo dos rexistrados antes da presenza da toxina na ría, pero os mariscadores do sector de pé das confrarías de San Telmo, Lourizán e Raxó celebraron igualmente o feito de volver á faena despois de tres semanas de parada por culpa da marea vermella. Semanas nas que estes traballadores tiveron que darse de baixa como autónomos para poder cobrar o paro.
As dúas últimas mostraxes realizadas polo Instituto Tecnolóxico para o Control do Medio Mariño de Galicia (Intecmar) levantaban o peche das zonas dous, catro e cinco da ría de Pontevedra.