O novo centro de saúde de Carballedo estará rematado en tres meses
Por Redacción
As obras para habilitar un novo centro de saúde en Cotobade no centro multiúsos de Carballedo estarán rematadas nun prazo de tres meses e contará con dúas consultas médicas, dúas salas de enfermaría, aseos e zona de espera.
Así o deu a coñecer o alcalde de Cotobade, Jorge Cubela, tras unha visita este mércores ás obras das futuras instalacións sanitarias en compañía do xerente da área de Xestión Integrada de Pontevedra e O Salnés, José Manuel González Álvarez, e o director da obra e redactor do proxecto, Juan José Bande Porto.
Segundo indicou Cubela, o director da obra explicou in situ a "boa marcha" das obras, así como as características e a distribución con que contará o novo centro médico. Tanto o xerente coma o alcalde salientaron a funcionalidade do novo centro médico.
A nova infraestrutura "virá a cubrir unha das demandas veciñais" de contar cun centro asistencial moderno e axeitado ás necesidades da poboación de Cotobade, así como a importancia de achegar os servizos e poder crear un centro forte de servizos para os cidadáns.
O local que se está a acondicionar, situado na planta baixa do centro multiúsos de Carballedo, ten unha superficie de 201,50 metros cadrados. As súas obras son resultado dun convenio subscrito entre o Concello de Cotobade e o Servizo Galego de Saúde en virtude do cal a Administración local se compromete a realizar a reforma e cédeo á Consellería de Sanidade para uso sanitario, conforme a un proxecto consensuado.
En virtude deste convenio, Sanidade comprométese, unha vez aprobadas e rematadas as obras, a trasladar as súas dependencias do centro de saúde emprazado no lugar da Igrexa (Carballedo) á planta baixa do inmoble e devolver ao Concello o local onde se desenvolve na actualidade a súa actividade sanitaria.
Relacionadas:
-
O novo centro de saúde de Cotobade empeza a funcionar o luns
Por Redacción |
-
Conclúen as obras do novo centro médico de Carballedo
Por Redacción |
-
Ultiman as obras para converter o multiusos de Carballedo nun novo centro de saúde
Por Redacción |
-
Sergas e Concello de Cotobade desbloquean o traslado do centro de saúde de Carballedo
Por Redacción |