A repartición de correos urxentes de Pontevedra, a mellor de España en 2013
Por Redacción
Despois de dous anos quedando finalista, a Unidade de Servizos Especiais (USE) de Correos en Pontevedra foi recoñecida este 2013 como a mellor unidade de España dentro da súa categoría e como un dos mellores centros da empresa postal.
A unidade levouse o Premio á Excelencia 2013 na categoría de unidades de servizos especiais con menor densidade de poboación polo traballo que desempeñan o seu equipo dende a súa base de traballo no pavillón de Correos na avenida de Lugo, segundo informou a empresa postal nun comunicado.
Nesta unidade traballan 12 persoas en quenda de mañá e de tarde, que se encargan de facer as entregas e recollidas de paquetería na cidade dende as 7.30 horas da mañá ata as 21.30 horas da noite. Están especializados na repartición de paquetería e de servizos postais urxentes como burofaxes ou certificados.
Os Premios á Excelencia son un recoñecemento anual que realiza Correos para destacar o traballo realizado nas unidades que mellores resultados de calidade obtiveron ao longo do ano. O premio nace coa filosofía de reforzar a excelencia entre as unidades recoñecendo o traballo do seu persoal.
En concreto, prémiase a dez unidades de toda España en distintas categorías, entre as que este ano hai unidades de Madrid, Vitigudino, Cantalejo, Albacete, Aldeanueva del Camino (Cáceres), Sevilla, Bilbao e Pontevedra.
Segundo informou Correos, o próximo mes de maio realizarase unha Xornada de Recoñecemento en Madrid onde o presidente da empresa, Javier Cuesta, recibirá os premiados para agradecerlles o traballo realizado ao longo do ano e entregarlles un obsequio.