Febreiro foi o mes con máis días de chuvia na cidade de Pontevedra, dende que hai rexistros
Por Redacción
Febreiro de 2014 foi o mes de febreiro no que máis días de chuvia se rexistraron, dende que se contabilizan os datos (1961), na cidade de Pontevedra. O informe meteorolóxico elaborado por Meteogalicia resume que o mes de febreiro estivo caracterizado polo continuo paso de borrascas polo Atlántico.
Neste documento, de acceso público a través da páxina web de Meteogalicia, recóllese que Pontevedra foi a cidade con maior número de días de chuvia, 26, cando o valor medio son 13, polo que se duplicaron as xornadas pasadas por auga; superando os 23 días de chuvia rexistrados en 1997.
Entre os datos recollidos por este informe destaca ademais a cifra de precipitacións acumuladas en febreiro, 394 litros por metro cadrado, lonxe con todo do máximo rexistrado en 1977, cando se alcanzaron os 585 litros. Ademais, tivemos unha temperatura media de 10,1 graos de máxima e de 6,7 graos de mínima.
Nadja, Petra, Qumaira, Ruth, Tini, Ulla e finalmente Christina foros os nomes dos derradeiros temporais que nos visitaron este inverno.
A única xornada na que Galicia non estivo afectada por avisos meteorolóxicos nin de mar nin de terra ao longo do pasado mes, foi o 19 de febreiro.