![Celso Xavier Milleiro Sánchez](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DE1AC_/_Il61oA_/52fa9299c26ce-74244_3810419030157_334963446_n.jpg)
Celso Xavier Milleiro Sánchez
Casilda
Nacida en Lourizán sobre 1884, Casilda Pazos Pérez foi unha desas mulleres esquecidas polo paso da historia, tamén por unha sociedade de cultura machista que escasamente valorou o traballo desenvolvido por mulleres e menos aínda se se trataba de loitar polos dereitos laborais.
Se Dolores Santiago Troitiño "A Pasionara" foi Presidenta da Sociedade de Chaboleiras e Empacadoras de Marín (CNT) e Carmen Vilas Veiga ocupou o mesmo cargo na Sociedade de Conserveiras e Estivadoras de Marín en 1936, Casilda foi a Presidenta da Sociedade de Obreiras e Obreiros dedicados á Extracción de Mariscos de Marín (UGT) en 1932.
Esta sociedade estaba conformada por cento vinte e tres asociad@s, tanto por mulleres como por homes, polo que toma máis valor a súa posición de dirixente nun período onde a muller non o tiña doado para chegar a postos de responsabilidade se había homes polo medio.
Pola súa familia sabemos que o seu traballo abranguía ademais o social, pois foi Alcaldesa de Barrio nos Praceres, lugar onde abre un pequeno bodegón en 1935.
Descoñezo cando faleceu, aínda que vivía en 1952.
As súas fillas Laureana "Misleona" e Josefina Vázquez Pazos herdaron o seu tesón e dignidade, pois foron detidas en febreiro de 1959 pola a súa oposición á construción da celulosas.