O Arxil deberá esperar o 5 de xullo para saber se mantén a categoría
Por Redacción
A Asemblea Xeral da Federación Española de Baloncesto, celebrada a pasada fin de semana en Madrid, deu por boas as propostas trasladadas pola Comisión Delegada en relación á composición das competicións cunha pequena excepción, xustamente a que afecta ao Club Baloncesto Arxil.
Segundo o determinado no encontro, a Asemblea deixa abertas dúas posiblidades para a Liga Feminina 2, volver aos 14 equipos por grupo ou a 12 ampliando a máxima categoría a 14, unhas opcións que fan que a posibilidade de que as verdes recuperen a praza perdida sexan máis elevadas.
A Federación habilitou agora un prazo, que conclúe o 5 de xullo, para que os clubs interesados en participar nesta categoría presenten a documentación necesaria, uns días que se aveciñan de nerviosismo na casa arxilista, como recoñece Lino Vázquez: "serán uns días de incerteza sobre se estaremos na LF2 ou non, aínda que todo parece indicar que si pero debemos esperar ata o 5 de xullo para coñecer as nosas posibilidades".
A fase regular, segundo o acordado, iniciarase o o 12 de outubro se son 14 os equipos ou o 26 se son 12 os clubs, para rematar a liga o 12 de abril. A fase de ascenso xogarase do 24 ao 27 de abril.