O Pontevedra empeza a aboar as nóminas pendentes a xogadores e empregados
Por Diego Espiño
A semana comezou cunha boa noticia para o primeiro equipo e empregados do Pontevedra Club de Fútbol. Coa chegada do mes de abril e tras recibir parte das cantidades comprometidas de subvencións e patrocinios, o club empezou a aboar parte das nóminas debidas.
Algúns xogadores recibiron este luns o diñeiro correspondente aos meses de xaneiro, febreiro e marzo, quedando pendente a última semana de novembro e o mes de decembro.
O compromiso da entidade granate é liquidar todos os atrasos esta mesma semana cos futbolistas e tamén cos empregados, incluídas cantidades pendentes da pasada tempada.
O primeiro plantel do Pontevedra acumulaba xa catro meses sen cobrar, feito que motivou a suspensión dun adestramento semanal, o do venres, ata que se emendase a situación ante as dificultades económicas dalgúns futbolistas e o custo que para eles supoñía desprazarse diariamente dende os seus respectivos lugares de residencia.