Lucía Vázquez volve á actividade para defender o seu liderado en Portugal
Por Redacción
Despois de dúas semanas de parón, Lucía Vázquez volve á competición no inicio dunha das fases máis importantes da tempada, que a levará a competir na Copa do Mundo de BTT en Albstadt (Alemaña) e La Bresee (Francia).
Antes, a ciclista de Vilaboa afronta esta fin de semana a súa primeira defensa do liderado na Taça de Portugal, competición que chega á súa cuarta cita do calendario (de cinco probas previstas) na localidade lusa de Fundão.
Lucía encabeza a clasificación xeral empatada a puntos coa estoniana Maaris Meier, que volverá ser a súa principal rival.
A deportista pontevedresa confía en que o descanso lle permitira superar os problemas respiratorios que afectaron o seu rendemento nas últimas competicións.
Debido á coincidencia de datas no calendario Lucía Vázquez tivo que escoller entre dous eventos nos que lidera a xeral, a terceira xornada do Superprestigio MTB en Tibi (Valencia) e a Taça de Portugal, decantándose pola cita lusa por tratarse dunha proba de nivel C1, polo que reparte máis puntos para o ránking da Unión Ciclista Internacional.
Relacionadas:
-
Lucía Vázquez roza o seu terceiro título en Portugal tras vencer en Fundao
Por Redacción |
-
Problemas respiratorios limitan o rendemento de Lucía Vázquez en Cataluña
Por Redacción |
-
Triunfo en Arnedo para Lucía Vázquez e liderado no Superprestigio MTB
Por Redacción |
-
Lucía Vázquez ascende ao liderado en Portugal
Por Redacción |