Xornada aciaga para o Froiz no Trofeo Guerrita
Por Redacción
Non tivo un bo día do Grupo Deportivo Supermercados Froiz na segunda cita da Copa de España Elite e Sub-23, o XXV Trofeo Guerrita celebrado na localidade murciana de Alcantarilla.
Chegaba o equipo pontevedrés tras debutar con bo pé na competición, pero en Murcia ningún dos seus corredores conseguiu brillar nunha proba dura e marcada polo vento.
As escapadas boas formáronse sen ciclistas do Froiz, que tampouco puideron progresar na montaña e tiveron ao seu mellor representantes en Francisco Medina, que atravesou a liña de meta no posto 32, a 6 minutos e 46 segundos do gañador, Álvaro Cuadros (Fundación Contador), que chegou en solitario tras descolgar no último descenso a un pequeno grupo doutros nove corredores.
O segundo ciclista dos pontevedreses na xeral foi David González no posto 42, a 8:01.
A próxima cita da Copa de España será a Klasika Aiztondo na localidade guipuscoana de Asteasu o vindeiro domingo día 6 de marzo.