Falece Cholo Piñeiro, exsecretario e directivo do Pontevedra CF durante máis de 20 anos
Por Redacción
José Manuel Piñeiro Troncoso, coñecido como "Cholo" Piñeiro, faleceu este luns aos 66 anos de idade vítima dun cancro co que levaba loitando dende hai bastante tempo.
Granate de toda a vida, non en van era residente do barrio do Burgo, veciño de Pasarón, Cholo Piñeiro chegou ao Pontevedra no ano 1976, da man do entón presidente Eulogio Vázquez Pereira, e sendo secretario Carlos Saburido, do que aprendeu as interioridades do fútbol.
Dende entón foi directivo, administrativo, secretario e delegado do primeiro equipo, ao longo de máis de 20 anos, ata que abandonou o club coa chegada á presidencia de Gerardo Lorenzo.
Cholo Piñeiro facíao absolutamente todo no Pontevedra de entón. Dende os contratos e fichas dos xogadores ata acompañar o primeiro equipo por toda España, exercendo de delegado, organizando desprazamentos e estando sempre ao lado do club dos seus amores, pois mesmo despois de deixar a directiva seguiu acudindo asiduamente aos partidos de Pasarón, mentres a saúde llo permitiu.
A casa mortuoria está instalada na Sala 2 do Tanatorio San Mauro, de Pontevedra, e o funeral polo seu eterno descanso terá lugar este martes, ás 18:00 horas, na Igrexa de Santiago Peregrino do Burgo. A continuación procederase á súa inhumación na intimidade familiar.