'Manita' do Poio Pescamar ao Marín Futsal no Derbi da Ría
Por Almu Dapena & Cristina Saiz
O fútbol sala pontevedrés viviu este sábado un novo Derbi da Ría no Pavillón da Raña, ao que Marín Futsal e Poio Pescamar chegaban con urxencias despois dos malos resultados dos últimos encontros.
Con todo, despois dun inicio parello, o cadro conserveiro consolidou o seu dominio e deixou moi tocado ás locais, primeiro con dous goles de Martita e Saki en menos dun minuto, e no segundo tempo, cando parecía que podía chegar a reacción, Rocío Gómez anotou un dobrete que agravou aínda máis a situación do Marín. Irene redondeou a goleada anotando o 0-5 final.
Comezou o derbi con respecto e nervios entre as xogadoras de ambos os conxuntos, que a pesar dos intentos de non cometer erros, precipitábanse á hora de dar o pase e enseguida perdían a posesión.
De feito, non foi ata pasados os cinco minutos cando se produciu o primeiro disparo entre os tres paus tras un roubo das vermellas en campo do Marín. Ale de Paz buscou o gol e Pinto desviou a saque de esquina.
Tras a ocasión foi o Poio Pescamar o que pasou a dominar, converténdose en dono da posesión aínda que sen apenas xerar perigo en área rival. Ao Marín, en cambio, non lle duraba nada o esférico nos pés e o seu adestrador Ramiro Díaz pediu tempo morto aos sete minutos e medio de xogo para tentar reverter a situación.
Con todo, despois da pausa monopolizó as ocasións o Poio. Ale de Paz filtrou o balón a Martita, que tentou superar a Pinto por abaixo, e despois probou fortuna a sete, pero a gardameta volveu rexeitar.
E non foi ata alcanzado o ecuador do primeiro tempo cando o Marín gozou da primeira chegada a portería rival. Adriana buscou bater a Elena nun man a man pero foi a porterá a que gañou a partida.
Volveu avisar Lara Balseiro cunha boa oportunidade que detivo Pinto e a partir de aí o encontro cambiou por completo. Iniciou Elena a posesión, o balón pasou por todas as xogadoras ata chegar a Lara Balseiro e centro a Martita, que subiu o 0-1 ao marcador.
Sen tempo para dixerir o gol, o Poio Pescamar converteuse en absoluto dominador. Sacou de centro o Marín, Saki presionou a posesión, roubou a carteira á defensora e bateu por abaixo a Pinto.
Despois do paso polos vestiarios buscou a reacción o equipo local e tivo con Adriana a mellor ocasión do segundo tempo tras un bo contragolpe, pero Elena, cunha boa parada abaixo, evitouno.
E dun posible 1-2 pasouse ao 0-3. Saki sacou un potente disparo afastado, Rocío Gómez recolleu o rexeite dentro da área, tomouse o seu tempo, fíxolle un chapeu para Pinto e anotou o terceiro para as conserveiras.
Con outro man a man de María tentou o Marín Futsal recortar diferenzas, pero de novo Elena, enorme baixo paus, truncou as opcións do seu rival.
As cousas non lle estaban saíndo ás de Ramiro Díaz neste Derbi da Ría e o Poio Pescamar confirmouno. Elena sacou de portería cara á banda dereita, Saki enviou a Rocío Gómez e esta, de primeiras, transformou o 0-4.
Pediu tempo morto o técnico marinense e a falta de 6 minutos e medio para a conclusión apostou por atacar con cinco. Con todo, lonxe de dar resultado, foi Pescamar o que se atopou cun novo tanto. Elena Aragón xutou, o esférico deu no corpo de Irene e entrou na portería, subindo así o definitivo 0-5 que permite ás rojillas volver sumar de tres e afundir aínda máis ao Marín Futsal na clasificación.
Consulta a acta nesta ligazón
Relacionadas:
-
O Poio Pescamar evita os 'cocos' no sorteo da Supercopa de España
Por Diego Espiño |
-
Gislaine Ribeiro 'Giba', segunda fichaxe de inverno do Marín Futsal
Por Redacción |
-
O Marín Futsal refórzase coa internacional brasileira Gi Portes
Por Redacción |
-
O Poio Pescamar mira cara a Torremolinos
Por Redacción |
-
Vacacións de Nadal como punto de inflexión para cambiar o rumbo en liga
Por Redacción |
-
Peche do ano con derrota en Ourense para o Marín Futsal (5-0)
Por Almu Dapena |
-
Repartición de puntos nun vibrante derbi entre Poio Pescamar e FSF Castro (2-2)
Por Redacción |
-
Un Derbi da Ría con dous equipos necesitados de puntuar
Por Redacción |
-
O Poio Pescamar queda sen tempo para culminar a remontada (3-4)
Por Redacción & Cristina Saiz |
-
Ocasións sen recompensa para o Marín Futsal ante o Viaxes Amarelle (3-1)
Por Almu Dapena |
-
Anna Escribano, á altura da balón de ouro Aitana Bonmatí ou de Pep Guardiola
Por Redacción |
-
O Poio Pescamar queda seco en Melilla (3-0)
Por Redacción |
-
Derrota fronte ao Rayo Majadahonda e susto na Raña, con Patri evacuada en ambulancia
Por Diego Espiño |