"Infamia" de Ledicia Costas inspira un videoxogo desenvolvido no campus de Pontevedra
Por Redacción
Catorce estudantes universitarios están a traballar de manera conxunta no desenvolvemento dun videoxogo creado a partir dunha das novelas da escritora pontevedresa Ledicia Costas, Infamia.
Este proxecto foi bautizado como Merlo, o nome da vila na que está ambientada a novela. O obxectivo é desenvolver un primeiro nivel do xogo ao longo deste cuadrimestre.
Os alumnos que forman este equipo de traballo son das facultades de Comunicación, do campus de Pontevedra; e de Enxeñaría de Telecomunicación, do de Vigo.
A idea é crear un xogo de sixilo e misterio en primeira persoa, que seguindo a trama do libro de Costas, ten como punto de partida a historia de Emma Cruz, que tras mudarse á vila de Merlo decide investigar a desaparición non resolta de dúas nenas, acontecida 25 anos antes.
Coa idea de que o alumnado teña ao longo do proceso de traballo algún tipo de feedback sobre o proxecto, este grupo presentou o seu proxecto a Michael Santorum, deseñador narrativo de Tequila Works, unha das principais empresas de desenvolvemento dos videoxogos de España.
Promovida polos docentes Beatriz Legerén, Luis Fernández, Mónica Valderrama, Antonio Pena e Enrique Costa, esta experiencia multidisciplinar lévase a cabo desde 2017, tomando sempre como punto de partida a obra dun escritor galego.
Relacionadas:
-
A serie mexicana "Atrapada" inspira un videoxogo deseñado no campus de Pontevedra
Por Alejandro Espiño |
-
Así é "Merlo", o videoxogo de misterio inspirado na novela "Infamia" de Ledicia Costas
Por Redacción |
-
Un videoxogo feito en Pontevedra achegará a problemática do cambio climático no medio mariño
Por Redacción |