Chega 'Sons Diversos' con Ángel Stanich, Calum, Nada Surf, Guadi Galego e Immaculate Fools
Por Alejandro Espiño
Cinco concertos que unen nun mesmo ciclo bandas e artistas de diferentes xéneros, pero baixo un mesmo denominador común: a boa música. Así describiu a concelleira de Cultura, Anxos Riveiro, a proposta Sons Diversos, que reunirá no Pazo da Cultura e no Teatro Principal artistas e músicas de todo o mundo.
O primeiro destes concertos será o de Ángel Stanich, que actuará este sábado 27 de febreiro ás nove da noite no Teatro Principal. Con tan só un disco no mercado, Camino ácido, este artista cántabro conseguiu abarrotar todo tipo de salas e festivais grazas a temas como Carbura, Mezcalito ou Metralleta Joe, xenuínos hits alternativos do indie nacional máis recente.
As entradas teñen un prezo de 10 euros e pódense adquirir en www.ataquilla.com.
A proposta para o público máis xuvenil será Calum, un dos artistas que saíu do programa La Voz Kids de Telecinco, e que subirá ao escenario do auditorio do Pazo da Cultura o sábado 5 de marzo, ás 21.00 horas. Presentará o seu primeiro disco, Hey Babe, un traballo composto por temas pop e rock latino, con letras en inglés e español.
Cada entrada, dispoñible a través de www.ticketea.com, ten un prezo de 25 euros.
Pola súa banda, os estadounidenses Nada Surf actuarán no Pazo da Cultura o 29 de abril, ás nove da noite. Presentarán en directo os temas do seu oitavo álbum You Know Who You Are, o primeiro da banda como cuarteto e que se pode considerar como a colección máis representativa das dúas décadas da carreira do grupo.
No seu caso, as entradas teñen un prezo de 20 euros e están dispoñibles a través de www.ataquilla.com.
O toque autóctono poñerao Guadi Galego, unha artista que Pontevedra levaba tempo querendo traer, segundo Anxos Riveiro. É unha das cantantes máis relevantes da escena musical galega e presentará no Teatro Principal, o 7 de maio ás 21.00 horas, os temas do seu disco Lúas de outubro e agosto, unha fermosa selección de cancións que presentan á artista cun son e unha proposta artística máis madura e máis atrevida.
As entradas custan 10 euros e pódense comprar en www.ataquilla.com.
O último concerto deste ciclo, o venres 20 de maio ás nove da noite no Pazo da Cultura, será o de Immaculate Fools. A banda británica, unha das referencias do pop dos anos 80 e 90, volveu aos escenarios para mediados da década pasada e debutará en Pontevedra co seu disco Turn The Whole World Down, un álbum visceral e emocional, no que versionan as súas cancións clásicas pero cun novo son.
Cada entrada véndese a 20 euros a través de www.ataquilla.com.
Relacionadas:
-
'Immaculate Fools', colofón británico para o ciclo Sons Diversos
Por Diego Torrado |
-
As 'Lúas de outubro e agosto' de Guadi Galego, o 7 de maio no Teatro Principal
Por Alejandro Espiño |
-
Nada Surf: "Non caímos no erro de ter un son fixo. Hai grupos que acaban sendo caricaturas de si mesmos"
Por Alejandro Espiño |
-
O fenómeno fan volve a Pontevedra con Calum
Por Diego Torrado |
-
Ángel Stanich, o primeiro 'son diverso' do novo ciclo musical de Pontevedra
Por Redacción & Diego Torrado |
-
Sesión extra de 'Imperdibles': Nada Surf actuará en Pontevedra o venres 29 de abril
Por Alejandro Espiño |
-
Ángel Stanich regresará a Pontevedra o 27 de febreiro para actuar no Teatro Principal
Por Alejandro Espiño |
-
Calum, o novo fenómeno teen, actuará o 5 de marzo no Pazo da Cultura
Por Redacción |